مساحة إعلانية
تخيل
تخيل لو مكانتش كدبه
تخيل تصحى تلاقي نفسك عند الجنه و بابها مش بيفتح
الزانيه اللي تابت دخلت وانت ملكش فرصه تانيه متقدرش تعيد حياتك ايوه انا عارف الحقيقه مكانتش باينه.
تخيل انك شايف الله و حواليه الملايكه
حاسس عشت تايه ملقتش الحقيقه لأخر ثانيه
و بتسأل نفسك هو الذنب ده ذنبي إن انا كإنسان اتشتت في احداث الحياه المتتاليه؟
تخيل بيدور حديث بينك و بين الله كالآتي
طب مانا كنت ببحث يوماتي و ملقتش الاجابه
ضيعت حياتي وحتى بعد مماتي لسه واقف الوقفه دي و مستني انك تسمع او حتى انك ترد علي كلماتي
لما انت موجود ليه مخلتش نفسك للعالم واضح؟
ليه ٤٠٠٠ ديانه وانا اللي لازم اختار منهم واحد؟
ليه ناس ملهمش مأوى حياتهم ذل و اهانه وناس ايدها عليها خواتم بدهب و الماظ مزيناها؟
ليه دايماً الناس اللي بنحتاجهم بيبقوا هما اول ناس بيمشوا؟
ولما الدنيا جت عليا اتقالي مفيش احن منك
كنت فين لما انا حكيتلك؟
كنت فين لما لفيت و جيتلك؟
كنت فين لما اشتكيتلك؟
من الدنيا و اللي خانوني
و اللي استأمنتهم باعوني
و اللي ضيعت حياتي علشانهم اخرتها بيمشو و يسيبوني
كل يوم بيقتلوني لما غيرهم يسألوني فين حبايبك؟
هأ سابوني
انا متأكد ايه الصح و ايه الغلط بس الشيطان قوي وانا قدامه خسران
طب ما طبيعي انا بالنسباله انسان
وانا لما بغلط مش بلاقي مكان
او حد اروحله علشان للاسف شعبك معظمه خسران
مهما عدت الايام وانا متأكد ان انا غلطان
الحياه بتعدي و لسه بغلط و هغلط كمان
لسه جوايا احساس ان انا ندمان
و لسه هندم قدام كل غلطه قدام
طب مانا ملقتش حد اسأله ملقتش حد معاه الاجابه
قالولي غبي علشان بسأل قلتلهم اغبيه معكوش دلاله
انا بسأل علشان عايز اجابه
عايز دليل ان الحياه مش غابه
عايز تفسير دقيق مش دجالين كدابه
طب كنت فين لما انا ندهتك؟
كنت فين لما انا فشلت؟
كنت فين لما انا سألتك انت ليه مش حاسس بحد؟
كنت فين لما حلمي اتقتل؟
كنت فين لما صوتي اتكتم؟
ولما كنت بحس بألم
كنت بكلمك كان عندي أمل
كل يوم بسألك عن دوري انا
الحياه تحدي انا مش قدها
بحكيلك احلامي و بمسك القلم
بكلمك و بكتب الكشكول اتملى
نفسي دي متكونش النهايه بس للاسف
انا كلامي انتهى
التعليقات