كلمات اغنية ايلي زغيب – جبان

بيخبّرونا عن الحبّ من نحنا وصغار،

بيوصفوه بالأحمر، بالورد، وبالبوسة،

بيخبّرونا كيف إنّو أحلى شعور بيمرق ع قلبك،

وإنّك بتستحقّ تنحَبّ.

وبتبقى عايش خايف تخسَر هالشّعور،

بتتكمّش بحبيبك وبتحطّو بقفص،

تبرم ع اللّي بتحبّن تخَبّيُن بصُوَر،

لأنّك جبان.

ما صدّقت لقيت اللّي يحبّك خيفان حدا يسرقو منّك.

بسّ مش الحقّ عليك،

ما حضّروك إنّو قلبك رح ينكسر ميّة مرّة

والحبّ مش محصور بحبيبك.

شي مرّة ضيّعت لعبة بتحبّا،

لقيت رفيقك بَعّد عنّك وصار رفقا مع غيرك،

ودّعت عزيز ع قلبك عالمطار،

بكيت لمّا خلصت علاقة،

وعيت من حلم بتتمنّى لو طوّل،

بست شخص لأوّل مرّة،

بست شخص لآخر مرّة،

غمرت حدا وما شدّ عليك،

بكيت باللّيل وما لقيت كتف تتكي عليه،

تبَسّمت لغريب وتبسّملك،

أو شفت ولد عم يبكي وجرّبت تخلّيه يضحك..

هيدا الحبّ،

كلّ يوم وكلّ شويّ،

موجود بكلّ زاوية مخبّا بوجوه وبغراض،

والوجع شقفة منّو،

والخوف، الخوف إنّك تخسَرو ولمّا تخسَرو

تحلُف إنّك ما ترجع تنَبّش عليه مرّة تانية،

بسّ دايمًا بتضعَف..

حِبّ ما تخاف تنكسر،

إذا انكَسَرت يعني حبّيت.

انكسِر ما تخاف تنوجع،

إذا انوجعت،

يعني انحَبّيت.