مساحة إعلانية
صحي في يوم مش فاكر من حياته أي حاجة
سأل نفسه أنا مين وقام يدور على إجابة
لقى في دولابه صورة صاحب عمره قال محمد
أنا فاكرك و بدأ ييجي في باله أكتر من مشهد
لقى موبايله ولقى الرقم طلبه بدون تفكير
رد صاحبه بياه يا صاحبي فينك من كتير
أنا فقدت ذاكرتي عشان كده اتصلت
خليها تحكيلك إزاي علشانها بعت طوب الأرض
بعد ما اتقفل في وشه سأل نفسه مين اللي أنا
بعت عشانها صاحبي وهو بيسأل نفسه لقى
دبلة وتحتيها ورقة، مسك الورقة و بدأ يقرأ
صعب عليا أقبل ماكونش أم أتمنى تفهم
إنهار وكسّر كل حاجة جت في طريقه إتجنن
فين و فين أدرك إن ده مش حل استسلم
بيُحاط بذكرياته مع مراته كأنه فيها
أي نعم ناسي كتير لكنه إفتكر حبه ليها
في حياتنا النسيان يُعتبر مرض ولا نعمة
أغلب ذكرياتنا حمل تقيل أكيد نسيانها إعفاء
إستسهلنا الغلط وإتجاهلنا صوت ضميرنا
دايما نشبع رغبات دلوقتي على حساب مصيرنا
في حياتنا النسيان يُعتبر مرض ولا نعمة
أغلب ذكرياتنا حمل تقيل أكيد نسيانها إعفاء
إستسهلنا الغلط وإتجاهلنا صوت ضميرنا
دايما نشبع رغبات دلوقتي على حساب مصيرنا
بعد يومين طوال قرر ينزل بين الناس
قعد على قهوة قابل عجوز مسميينه الخال
سأله مالك يا إبني شايل هم الدنيا لوحدك
رد نسيت الناس، والناس نسيتني، إيه اللي يضحك؟
ضحك الخال الواد إتنرفز، سأله إيه مشكلتي تافهة؟
رد يا إبني أنا إبني رماني في الشارع إديني مرضك لفة
في الآخر خذه يكشف له و قاله يا إبني ثق في الله
والدكتور طمنه هتفتكر بالوقت والعلاج
رجع بيته و حبس نفسه لمدة أسبوعين
أدوية و تمرينات ذاكرة بالكاد إفتكر شيئ
قبل ما ينهار عصبيا قال ينزل يرغي مع الخال
قعد مستنيه على القهوة وزهق بعد تالت شاي
سأل القهوجي عليه، رد القهوجي بكره غريب
الخال ربنا إفتكره، والله ما أعرف ليه ناسيك
طلع محفظته يحاسب كان زعلان أد ما مذهول
وقعت من محفظته صورة الخال بمعنى أصح أبوه
اللي ناسي بيجري ورا ماضيه و لو دقيقة دقيقة
واللي فاكر نفسه يبدل الحقيقة بصفحة جديدة
لو قدامك فرصة تصلح غلطة ماتسيبهاش
غيرك إتأخر على ما فهم إن الحياة مابتستناش
اللي ناسي بيجري ورا ماضيه و لو دقيقة دقيقة
واللي فاكر نفسه يبدل الحقيقة بصفحة جديدة
لو قدامك فرصة تصلح غلطة ماتسيبهاش
غيرك إتأخر على ما فهم إن الحياة مابتستناش
التعليقات