مساحة إعلانية
مش بحكي مشاعري عشان فعلاً
الشكوة مذلة لغير الله
انا ياما حكيت سري وخانوا
وضحكوا ع الحزن وع المُعناه
الناس بتعامل بعض بِغل
الناس بتذل
الناس بتمل
الناس بتشوف اللي بيحكي
شخص مزودها بيرمي بلاه
-
الناس لو تفقد حلم تموت
ف مابالك ناس تفقد اشخاص
الوقت ان نسانا شوية
صعب انه يقول للقلب خلاص
-
التوهه ف أمر مبتريحش
بالذات لو كانت للمجهول
ازاي مش مرتاح ف الوحدة
ومفيش تصاريح للناس بدخول
الخوف بيزيد من كل جديد
وبشوف العزلة الحل اكيد
جوايا خيوط كلها تعقيد
وعشان كدة بطلت اتكلم
الوحدة رافضها لكن أصلح
من عيشة هدفها اني اتعلم
-
الوحدة حقيقي احسن بكتير
من ناس فترات فعلاً زايفة
وعشان من كتر الضلمة العين
لو شافت نور هتكون خايفة
الثقة في الناس قلت بدليل
الحب ان دق الباب يتصد
علشان ردينا قلوبنا زمان
ولقينا الغدر ففعل ورد
وواربنا الباب ومخوناش
وادينا ف خير للغير ببلاش
ولقينا الصح بيتلغبط
والايد اللي اتمدت تتعض
-
اهمال الناس للناس مؤلم
لكن تتعز لو انت بعيد
اول ما تقرب هتجرب
للمرة الاولي تشوف تجاعيد
هتشيب م الحزن وتتعود
انك وسطيهم بس وحيد
-
يشهد ربنا اني استنيت
لكن مليت
وتعبت ادور ف اتعور
وانزف م الناس للناس في عياط
الجرح مبيلمش ولقيت
في السكة طريق مليان احباط
ف إختارت افضفض للاوراق
والحِبر يكون هو دموعي
اوقات بتعب واوقات بشتاق
والخوف بقا طبعي وموضوعي
كتر التفكير مش صحي عشان
علي طول سرحان مش سامع حد
الوحدة مفر من الحيرة
والعزلة طريق مفيهوش غيرة
والبُعد عظيم لو ناس عيرة
والصمت مهدأ مش بيمل
الناس فاطباعها تعيش وتذل
والصاحب لو صاحب صاحبه
ميسيبش ايديه وقت المُعناه
وعشان كدة انا مؤمن جداً
بالشكوة مذلة لغير الله
التعليقات