مساحة إعلانية
ودعتك ... بس بالشكل والله
شودع منك وروحي بيدك
بعدني بخيالي احب واعشك بيك
هسة قبل شوية بايس خدودك
لا وازيدك من الشعر بيت
تتشاقة وياية تكلي الزم حدودك
وضحكت اني وانت وياي
اشو بالعناد راح اگرص زنودك
..............................................
اي ضحكة خير ان شاء الله
الصراحة اني مكابل الصورة
تدري بس الصورة ضلت مثل ماهية
ما غيرت ابتسامتهة ، ما مثلت ... ضلت حرة
وضعيتي ؟ لا الامور زينه
بس هيج احس عالگلب جمرة
هيج شوية يضيق النفس مرات
يعني شلون المختنك صدرة
مرات ابجي
مو هواية
هيج تقريبا كل دقيقة
عادي يعني بس من تجيني الحسرة
اضحك ؟ اي اضحك هواي ... علة روحي
فنة اليفتهم حياتي ... صايرة حزورة
هواي كلام احس بداخلي محبوس
اريد احجي و كلماتي بداخلي مأسورة
مشاعري اطفالج و يكسرون الخاطر
مشتاقيلج واقشمرهم ... اكلهم امكم مسافرة
صعب اكعد كبالج وما المس حنانج
اختلف كل شي بيج حتة النضرة
جانت نضرتج مليانه دفو
وهسة كاتلتني الحسرة
كاضين ايامنه بالتمثيل
الله يعين رواحنة شلون صابرة
صاير اخاف اشوف بوجهج
حبج كلش غالي و اني بحبج ابن فقرة
لا متعبان اصلا عادي
يعني واذا وياية تغيرت النبرة ؟
قابل شصار يعني ؟
هوة بس خسرت حبيبتي وامي وابوية وصديقتي والمرة
عادي مدا اخلي عطرنة وشنو يعني
اني اصلا صاير اخاف اشتم عطرة
متعلم هالعطر بحظني اشتمة
شوية زحمة مو علة صدري ويم الناس ياخذلة فرة
لاعادي مو شغلة اغار
بس شو يصعد ضغطي واتعصب وعيوني تصير حمرة
تريدين الصدك ؟
كلش تعبان وصعب اشرح البية
سألي واحد فاقد امة وضاك طعم الخسارة
وسالي واحد خسر بنتة بنفس اليوم
بلكي يكدر يوصفلج شعورة
اي وصحتي بالنازل يومية
من برة ابين جبل من جوة عايش بالقدرة
بالليل اكعد مرتين تلاثة
كلبي وضعيته كلش خطرة
شوفي شكبر هالكون وشكد البشر تافهين
بس الدنيا بعيني صارت كلش صغيرة
وياريت بس وكفت حياتي من بعدج
من ذاك اليوم وحياتي ترجع ليورة
بس لو تدري شصاير بحالي
من برة زين ابين بس من جوة مجزرة
لازم احسب حساب لكل تصرف
حياتي صارت عالمسطرة
وصاير احس بالفشلة
مشتاقلج ومحتاجج وكلشي احجيلج
صاير مثل اليكتب بقلم خلصان حبرة
وانتي كالعادة رابحة الاوسكار
ممثل بارع واتقن دورة
كلشي بداخلج مدفون مايطلع
بالتمثيل دومج شاطرة
حالنة مثل الخسر كلشي
وتشوفة حامد الله وشاكرة
جانت حياتنا مليانة ضجيج
وهسة تسمع الصوت لو تذب ابرة
اشتاقلج وسوالفنة تغيرت
ارجع للرسايل القديمة واقرة
وكلشي ببيتنا يذكرني بيج
صايرة حياتي كلهة برة
متأمل بباجر جنت اني وياج
تتذكرين من سوينة الخيرة ؟
ادفع عمري كله فدوة
بس ارجع لايام الفارس والسترة
نايم انت من الحزن ... نوم العافية
واني من الحزن اسهر واتحسر
قبل بهالوقت جانت توهة بادية السهرة
...............................................................
احس مابية حيل افتح حتة الجفن
همومي هواية وبفركاج همي يكبر
شنسة منج وانتي تمشين بدمي
اكتب بيج شعر لحد ما قلم عمري يخلص حبر
صاير من احجيلج ما ارتاح
گلبج تعب و يادوب اوجاعة مدبر
اعرف لازم اعوفج لحياتج
صاير اناني بعدني ليهسة بحبج اكابر
والله اعشگج عشگ
ردتج وياية للموت ... بس هوة الوكت اغبر
اقتديت بيج بكلشي بحياتي
صار وقت اتعلم منج الصبر
البية بعد ما احجي ويبقة بية
اختنك بي وعلة روحي استكبر
ولاتتعجب من اضحك وتلكاني بعدين ابجي
مثل الورد اني مرات ازين عرس و مرات ازين گبر
التعليقات