كلمات اغنية جرين – ٢ أبريل

اليوم ٢ أبريل ٢٠١٨

المنبه مرنش والميتنج الساعة ١١

لبست، نزلت في عشر دقايق

نسيت أبص انهي طريق كان سالك

بعد اول يمين، الدنيا مبتتحركش

مش مهم، المهم الأغاني متبطلش

فتحت الراديو، الاريل مسروق

وصلت موبايلي، وكملت أسوق

زهقان، فبعلي كل شوية الصوت

نفس الأغاني بسمعها كل يوم..

أغنية، في التانية، في التالتة..

عفوا! الباقة خلصانة!

اليوم ٢ أبريل ٢٠١٨

لسه قاعد في مكاني، والساعة بقت ١٢

في وسط السكوت، بدأت أفكر

هي ليه أسئلتي عماله تتكرر؟

زي إللي قدامي، أسئلتي مبتتحركش..

يا عم أتحرك، أفكاري مبتبطلش..

هو أنا أيه اللي جابني هنا؟

وليه لما بسأل ليه بتزتنق كده؟

مكنتش فاكر السكوت بيخوف

مكنتش عارف افكاري بتخوف

فكرة، في التانية، في التالتة..

مع كل سؤال، بكون إنسان..

مع كل جواب، بسأل سؤال..