مساحة إعلانية
Verse 1 ( الطبقة الارستقراطية )
مستغرب أنك مصدق نفسك وعايش دور المظلوم
مع أنك عارف أنك عاشق لخرق القانون
بتحب تستخبي جوه الفوضي
وشايف انه ذنبي اني عايش حياتي ارقي
كل تبريرك مغالطة بادن معاك ف مالطة
عاوز تعيش في العفن عشان كسلان وبتطلب شفقة
بقيت عنصري عشان بنتقدك بترمي اللوم عالثروة
مش خدتوا فرصتكوا طلعتوا عملتوا ثورة
عيش حريه طالبتوا كل العالم سامعكم
نظام وقعتم ولسه بفقرك قاعد
يعني السياسة بريئه منكم
لا
مش هقول أنك خاين هقول مغسول مخك عشان متتعلقش مشانق
عاوزها تمشي فوضي عشان الباشا متضايق
عطل طريق رئيسي عشان مع غبي زيك تتخانق
تتهمني بالتعالي عشان بقولك الحقايق
وجودكوا زي البنزين في بلدنا ولعتوا الحرايق
بجد قرفتونا
تخلف 12 عيل وتقول اكليهم ياحكومة
اجيبلك الزتوتة
أنت قاصد تعمل كده عشان يبقالك حجة تطلب معونة
بالبلدي تشحت
وياريتك شحات عادي ده أنت كمان عينك بجحه
لما تاخد الرشوة تبقي قدامي نيتك سمحة
ولما تشوفني أعمل حرام تقلبلي شيخ وماسك السبحة
أنت مالك وماله
ربك عطالو خير ودفع التمن شقي بداله
حقدك خلاك تشوف الخير وتتمني زواله
يطلع علي لسانك في جملة تلاقي امه جيبهاله
خسران وبرضه مصمم تخسر الرهان
ليه مش متقبل ان ربك خلقنا طبقات
دائما ناسب نجاحي اني وصلته بواسطات
قاعد تتفلسف كانك متربي علي ايد سقراط
لوم نفسك أنك مكملتش علامك
الدولة تعليمها مجاني بس كان فين التزامك
بتحط شماعتك ان الفقر هانك
طب عملت ايه في طفولتك غير أنك ولعت دخانك
هاها
ماهو جيل ورا جيل بيسلم
ماهو ابنك هيشوفك ومنك هيتعلم
يطلع جيل أسوأ من اللي قبله حيوان متكلم
حتي الحيوان ممكن يتعلم لما يتألم
عمري ماكنت بحلم نبقي واحد ويحصل تلاحم
بس ليه دائما صورة الفقير في ذهني فاتح سلاحه
بدل ما يبصلي في مالي عاوز اشوف قصة كفاحه
بدل ما أنت قافل علي نفسك صندوق ورامي مفتاحه
ارمي اللوم علي الحكومة
ارمي اللوم علي رأس المال
ارمي اللوم علي أي حد الا نفسك شغل عيال
ارمي اللوم عالمحسوبية
ارمي اللوم عالانسانية
ارمي اللوم علي المهية
وقولي دي ظروفي المادية
الفرق بينا hook x4
Verse 2 ( الطبقة المتوسطة والكادحة )
خلاص خلصت
حاولت تنزل راسي فالارض
حاولت تبعني بتمن السجارة الفرط
متخيل اني بكلامك السطحي اتآثرت
طموحي كان عالي وقع علي صخر الطمع اتكسرت
ديني مش فلوس زيكم اعتبرني كفرت
ازاي تحاكمني في محكمتك وتحط لنفسك شرط
أنك الخصم والقاضي بعدها عليا حكمت
بتحلل الظروف علي كيفك كآني اخترت
ديب جاي بتكلمني عالوطن كأني شريك
نسيت التفريق بين اللبس الرخيص والشيك
تضم اللي شبهك جمبك وتقسم فريق
حطتني في سجن مخك اللي بانيِه وعارف إني برئ
زي الشاهد الزور بتكدب وتصدق الكدبة
بتكلمني عن الرقي كآني نفسي اعيش في عشه
الطرق السهلة بتسدها بالشوك بتفرشها
مستكتر اللقمة في بوقي قبل ما اكلها بتنتشها
اخويا اتعين ولا اخوك يابن الناس الواصلة
ايوة هقولك واسطة بينا هي النقطة الفاصلة
في الاخر اجري الادني وانت تعلي الحد الاقصي
وجاي دلوقت بعينك البجحة ترمي اللوم عالثورة
ايوة طالبنا بالحرية وبلقمة العيش
بس أنت لسه لابس حرير وانا لسه لابس خيش
الفرق مش فلوس الفرق بينا في كل شيء
ابنك في مارينا وابني في سيناء بيستشهد فالجيش
أنا فعلا مخي مغسول بس بمياة المجاري
حتي اللقمة اللي بطفحها مرشوشة بالكيماوي
فشل كلوي وسرطان وبشقى كأني انتحاري
الشقٓي عندنا اجباري الشغل عندك اختياري
سبتني للجهل يآكلني وجاي دلوقت تلومني
بتكلمني عن التقشف وتطلع علي قنوات تقهرني
بطنك مليانة وجاي تقنعني وعالجوع بتصبرني
ولو طالبت بحقي يابتحبسني ياتخوني
ليه شايفني نكرة ماليش قيمة الا فالانتخابات
مجلس الشعب فلوس وسلطه وزود فالفترات
بتسقونا بشوية زيت وسكر أشتروا الاصوات
أصل اللقمة الواحده بتفرق مع ناس عايشين أموات
الغلط فينا احنا الاتنين مفيش كلام
لو اخدنا حق مش حقنا مفيش فيها استثناء
بس الفرق لو سرقت بسرقها عشان افضل عايش
أنت بتسرق الملايين عشان تزود اللي معاك
ابني المدينة واعزل نفسك وابني عليا اسوار
وريني عالشاشة حياة تانية بتجبلي انبهار
حتي النظرة مستكترها قاعدلي بالمرصاد
لساني لو فكر يطلع بتحضروا المقصات
ارمي اللوم علي الغلابة
ارمي اللوم عالمحتاجين
ارمي اللوم علي أي حد غير اللي بيسرقوا ملايين
ارمي اللوم علي الحساد
ارمي اللوم علي الحرمان
ارمي اللوم علي الذكاه
وقول مش من حق الجعان
الفرق بينا ...
التعليقات