مساحة إعلانية
الليلة عاشر قمر
بيعدي فوق بيتنا
مادد ايديه ، و القدر
جاي جرئ ناحيتها
وقف الخطر ع الباب في سطوتها
خبط و مفتحناش
زاد المطر فدلقنا قهوتها
والبرق صده فلاش
الرعد في الدويلات
والبرد رصاص كل جتتنا
مدرتش غير بيها
كت طايرة لحظتها
الضربة جت فيها
وبدالي صدتها
فمسكت انا ايدها
وصرخت مش هي
الذنب كان ذنبي
و الضربة دي ليا
دخلتها جمبي
صدتها جت فيا
فحضنتها بقلبي
وضحكت ع الصدفة
طايرين كما صدفة
بتصد موج عالي
والبحر قالهالي
العضم لازم يتكسر وقتي
عاشر قمر زارنا
والحادثة في دماغي
وكأنها دلوقتي
" يارب"
مفضلش غيرها خلاص علي لساني
الرب وعده امين واهو صوته في وداني
وداني سابع سما
ورماني فوق ملحمة
وردة ف قفص محكمة
والشبكة في رقبتي
خطة شيطان محكمة
بنت بصحيح إنما
كل أما الدوس كلما
زادت تروس الضغط
في جعلني،،،،،
واهو زي م سمعتي
ممنوع نهائي تحريك رجلك
دقتين و تيجي الشرطة و تحقق
شدي الوريد من بقك أكمنك
فيه ذنب فيكي و لسة متشعلق
والحلم يتحقق
ساعتين زمن
وتموتي من تاني
الأولي من الوحدة
والتانية من تعبك
التالتة من ذنبك او خوف بيدلدق
الكدبة تتصدق
فاتفضلي بسرعة
وسيبينا نسترزق، ،،،،،،،
مناديل ورق
حبة عرق
خلفية موسيقية
الاسم ايه
والسن ايه
والنعمة جنية
متصاب بروح
ممنوع تبوح
والسر انسية
مناديل ورق مكتوب عليها عيال
حبة عرق لسة السبق شغال
خلفية موسيقية
واخترت ابعد و قدرت ابعد حتي الهجر قدرت عليه
الاسم ايه او ليه يطول البال
السن ايه لزمته أعتبره بس مثال
والتهمة جنية حبت في يوم تمثال
متصاب بروح بيحبها غيره
ممنوع تبوح بالسر دا لغيره
والسر انسية وكتافها من خيره
موااااال طويل
وخلاصته في الآتي
هيجيك في يوم الحب و يموت بدون أسباب
هتحب حد غريب ويرد عقب الباب
بتروح لجرح قديم مكتوب عليكو غياب
وتجيلك الشاطرة،، هتحبها جدا ،، وتسيبها دا لأن
جلب الهوي غلاب
معذورة وحدتها
حبت في يوم كداب
معذورة جرائتها
الجرح دايسه كلاب
عاشر قمر
وأنا لسة روحي بتنكمش
كل أما أبص لفوق
صليت بكل ما فيا من قوة
تمنحني بس هدوء
او أنام بدون م أبكي
و استرجع الماضي
عاشر قمر و البيت
مازال فاضي
من كل حاجة
إلا من حضنها
انا أمي يا بني
بتنتشي بصبرها
وتشيل جبال
مين اللي قال
الشدة بس رجال؟
مسمعش عنها يجوز
ولكنه حان وقتها
أمي اللي مكتوبلها
الجنة تحتيها
دلوقتي بتعاني
وهقولها من تاني
دا فيوم من الأيام
انشالله بعد 200 قمر
راح تيجي شمسك في السهر
وتقوي عضمك يترسم بسلام
اوعاك تصدق أن كله كلام
غمض عنيك
وشوش دماغك كلها
فك اللجام وانشق قوام قلها
يا نفسي اصحي و سلمي
بصي النهار الجاي و انتظري
فتح عنيك
تلقاك سليم
وأن اللي فات ،، أوقات
خداع بصري
التعليقات