مساحة إعلانية
اسمع طفح الكيل فجيت اكشف المستور
ما عاد في شي بيتخبى اليوم اللعب عالمكشوف
من فوق الأسطوح وجع شعبي جايي بوح
وكل سطر مكتوب بهالتراك اعتبروا صرخة روح
تسونامي الجهل ضرب العقول غير النفوس
متل الكابوس سكن أرواح ضيع الأصول
كبت عالروح وين ما تروح تكبر الجروح
عادي يرضوا يربوا بالذل كرمال رزمة فلوس
ليك انعدم الضمير لما تلاقي طفل شريد
بالشوارع نايم وابن البيك نايم عالحرير
انعدم الضمير لما الحلم صار ربطة ورغيف
وسهرة من سهراتو بتطعمي الف فقير
بداخل متاهة بين هالأرض سماها
انحكم علينا نبقى لعبة للخدمة والطاعة
العملة لعبة وسخة ما كنا نعرف مداها
عنا ناس كرمال قرشين بترضى تبيع مين رباها
دير بالك ياما المظاهر خداعة
واديش صاحبنا ناس وطلعت متخبيية بتيابها
واديش شفنا بنات لتنشهر خلعت حجابها
واديش شفنا شباب عالتيكتوك رقص ومياعة
مجتمع فاضي ومنافق ما عاد بلومه
بدك سلطة بدك واسطة بس زودلو بفلوسو
كبسلو بأيدو كم ألف ولمع الصباط وبوسو
مبروك معك تصريح الضعيف صار فيك تدوسو
لعبة شطرنج وكلنا فيها الجنود
عادي يرضوا يضحوا فيك كرمال الملك ما يموت
كم طعنة انطعنا عد كم خنجر مسموم
انغرز بحلقنا كرمال ما نعبر ونبوح
ولا اوعى تحكي داوي حالك بالسكوت
الحيطان الها ادان عنا مافي شي مستور
عنا تعتيم عالنور عنا كتم عالقلوب
عنا ما منحفر لنعمر عنا منحفر قبور
ما عم فرق بين هالناس كنو حفلة هالويين
ضايع بين ألف قناع ما عاد أعرف صاحبي مين
فبتبدأ بخلع القناع عن وجوه الملايين
لتكتشف بأنو الكل مخبي جواه شياطين
عنا بتبكي الرجال قهر وحسرة عالحال
منحمل حمل الجبال لنأمن لقمة بالحلال
وبتبقى الرشوة مفتاح لتفتح كل البواب
لك ما بتقدر تسكتني لو تربطني بأغلال
سماع لحمنا لحم سباع تخسى تنهشنا الكلاب
ما عنا خوف من الكلبشا ولا السجن ولا السجان
الشيطان أخرس وكلمة الحق بتنقال
ما عنا كبير الا الله سكر عالكلام
مات الإحساس فينا تربطت إيدينا
بالقاع اندفنا بالحزن انكوينا وللواقع المر استسلمنا
وللموت انرمينا البشر مجرد أرقام عند يلي حاكمينا
بين حيطانك يا وطن ألف موتة بتموت
وما حدا بيسمع بصوتك الا علام الغيوب
بتسكن جواك العتمة ما عاد بتشوف النور
وياما بالسجن مظاليم وياما بكيت العيون
لا تقلي بتهون والأخ عم يقتل أخوه
والأبن ضحى بأبوه ونسي يلي ربوه
ما تقلي بتهون والصاحب صاحبو بيخون
والعاقل صفى مجنون والقاتل شهيد زفوه
فما في شجرة مهما عليت رح توصل لربا
وهالزمن دولاب وكل فترة منو محطة
وشوف كيف الجذور بتنبت من قلب الصخرة
وشوف كيف العيون فضحت صاحبا بحقدا
الدنيا بتقسى وبدك تقاتل لتعيش
وثباتك فيها فرصة يا بتصيب يا بتخيب
والي تربى عالنفاق والخوف عليهم رح بيشيب
وكل ظالم ظلم انسان اخرتو بمزبلة التاريخ
التعليقات