مساحة إعلانية
على دروب المعالي
مأمون النطاح
على دروب المعالي يا سليل الـــ آل
يابن حيدر علي وَيَا صاحب العِترة
يامن صفوة نسل ذاك النبي المُختار
يل جدّك محمد وامك الزهرة
يا حزمة مبادئ تمشي فوگ الگاع
ويل حبّك عقيدة وسيرتك عبرة
انت اول شرخ في راية الاسلام
وانت اول ظلم ما يندفن ذكره
وانت اول كرامة تقارع الطغيان
وانت اول شهامة تورّث الثورة
وانت اول شهيد يموت بالخذلان
وانت اول شهادة تعيش منتصرة
وانت اول امام يموت بس عطشان
وامواج الفرات بسدّه متكسرة
من صهلت الخيل وعلا غبار الموت
وبدى غيم النبل من فوگ يتذرّى
ما هبت المنايا ولا رخت يمناك
ولا اهتزت عزيمة ولا گلت كثرة
يا سيد شباب الجنّة يا مظلوم
كل حامل مصاب بحضرتك يبرا
يا اول وجيه يموت واهله وياه
وعلى درب الشريعة يجود في نحره
يابن بنت النبي لو تجي تشوف الحال
من اهل السياسة وناسها الوذرة
باسمك فرهدونه وباسمك يقتلون
ومثلوا بالعفيف وكشّفوا ستره
وانته اسمك حشاه يا سيد الاحرار
يابن ذيج الزچيّة وناصر الفقرة
على فكر الحسين تعاقبت اجيال
وعلى حب الحسين تهجّأ الـ يقرا
يعلّمنا الحسين الثورة عالطغيان
ويعلّمنا الظلم ميدوم كل عمره
وعلى حب آلك تربينا واحنا زغار
والـ يبغض حسين يموت بالحسرة
تضل قبلة المُعدم غاية الملهوف
وتضل حرزه وحصينه ومبلغه ونذره
التعليقات