مساحة إعلانية
من فيافي ديرتي جيت احث الرجل جيت
ممتطي مطية ما تخالطها الوسوم
في شداد الراحلة كم سرحت وكم سريت
اطرد الايام طرد النعام مع الحزوم
وكم رضيت وكم زعلت وزعلت وكم رضيت
طاوي بطني واسج عن الوجبة واصوم
وكم بكيت وكم ضحكت وضحكت وكم بكيت
تدبر الدنيا بعض النواجذ فالبهوم
الزمان اللي كواني بناره واكتويت
ماحجبت الوجه بالقيظ عن لفح السموم
الولد دون الوطن والمعيشة يستميت
ما يخلي الواجب الي تخليه الرخوم
اقتلب وادور الرزق وبحظي رضيت
واقتطع مناكب الارض ما اسمع من يلوم
اطلب الخيرة ليا اخترت فرجة وانتويت
ما يرد المنتوي صوت ذيب وحس بوم
كان ماجاك الولد يجتلد لو حي ميت
من حساب اللي مريف المقابر من اللحوم
عيب اردد ليت وانا ولد واقول ليت
منوة من قبلنا ما قضت لحدن لزوم
غبت عن داري مغرب وعنها ما سليت
جيتها يوم الفرج لاح من روس الرجوم
والسلام مبارك العيد وانا لك فديت
ياحبيب الشعب وابرك من الايام يوم
يوم سقت القافية فيك والله ما غديت
مثل سوق القافلة للجدي بين النجوم
فيك يالقطب الشمالي بمسراي اهتديت
كل ما يممت يمك تعرضت اليموم
فيك يابن اليعربية وانا منك ابتديت
رايم العليا ولا غير عبد الله يروم
المواقف غالية كم عطيت وكم خذيت
الحياة لها ضريبة وتتبعها رسوم
اشهد انك نخوة المجد للمجد انتخيت
نخوة ماتارد الا مواريد السهوم
واشهد انك في مسيرتك ولشعبك وفيت
منك واصلنا المسيرة وحققنا الحلوم
واشهد انك يوم خضت المناصب ثم وليت
كرسي التدبير بالفعل شتت الوهوم
واشهد انك صايب الراي بافكارك سعيت
للتالف والتكاتف وتسكيت الخصوم
في ميادين الديانات حاورت ومضيت
ومن يعارض في مساعيك جعله ما يقوم
ثور النايم وقله علامك ما صحيت
الافاعي تدخل الناس من تحت الهدوم
ناس ما تدري عن اللي يدور وكيت كيت
خوض حوض ورجل خيل على الفارس تعوم
المخاطر واردة وانت عنها قد دريت
كل طلعة شمس منها يبينن السلوم
ياعمر في رحلتك ماهدمت الا بنيت
ما تعرضت لكنيسة ولا روعت قوم
معدلك فاروق واعظم اخطاك اللي خطيت
كل من ودعك مستقبلك عند القدوم
وانت يا قايد وطنا مشينا اللي مشيت
المثابر بالصبر والغنايم بالعزوم
ارفع الراية وسل السلاح ليا غزيت
بالاماني كم قطع الايادي والخشوم
يستتب الامن وليا اهتنى الشعب اهتنيت
يسهر القبطان واللي على المركب ينوم
شاهر سيف العدالة وللمصحف قريت
تنقذ المظلوم من تحت لحيان الظلوم
انجبك صقر الجزيرة وفي حضنه ربيت
فيصلي مر كبده على كبده يزوم
حنكك حنكة بطل للمواجيب ارتكيت
من نصيبك يكبر القسم من بين القسوم
يا عريب الاصل والفصل للجوزا سميت
عن شومة الغدر والشك والشرك معصوم
بالمغارب والمشارق لك السمعة وصيت
ديدينك بالكون تحت السما فوق الغيوم
التعليقات