مساحة إعلانية
بيلضُم حزنه ف حروفه
و يسجن روحه ف القافية
بيحرق حلم ف سيجارته
و يرمي الهم ف الطافية
بيعشق بُعدُه ع الحاجة
و يزهد وقت ما يقرَّب
فيلعن دنيا مش دايمة
و يسهر ليله متغرب
و يكره دوره ع المسرح
و يرمي النص من إيده
يعيده المشهد الماسخ
بيبكي ف ركن ف الأوضه
و صورة ف دُرجُه مركونة
و مشهد تحت بلكونة
و واد ف إيديها مش شبهه!
فيرحل قبل ما تشوفه
و يلضم حزن ف حروفه
و يبكي بحرقة ف الأوضة
ف نفس المشهد الماسخ
ضيوف ف الدنيا بنعافر
بنبلَع حزننا عافية
نلف الحلم ف سيجارة
و نرمي الهَم ف الطافية
من يوم ما اتكعبلت ف حزنك
و محدش فاضل وياك
و كأنك خطوة ف سِكِّتهُم
الناس بتعدّي و تنْسَاك
مش فاضل منك غير قلمك
ولا فاضل منهم إلاك
ولا فاضل حُضن بتهربله
لو خايف اهرب جواك
الناس أمراض
بلْبَعْلَك حبَّيْتين وحدة
و كآسين نسيان
و مضاد أحزان أو بني آدمين
الناس دخان
نَفَسِين طايرين
و شريط متعاد
أشباه و روتين
و كلام و وعود
و أحبال دايبين
إياك تتعلق يوم لتموت
دي الدنيا مسابقة و ليها شروط
إن عوزت تفوز و تعيش مبسوط
إزهد ف الطين
التعليقات