مساحة إعلانية
مبروك عليكي .. اديكي فرحانه و ايديه في ايديكي
ولا شوفتك زعلتي ولا حسيت بـ دموع في عينيكي
ازاي نسيتي .. كرهتيني و خلاص قسيتي
كنت بعيط لما مشيتي ولا بصيتي ولا حسيتي
قولتي في داهيه .. و ايه يعني هيزعل شويه
بعدين هينسى و انا منسيتش حاجه ما بينا فايته
كنتي قايله انك حباني و انك باقيه عليا
و بيعتي في ثانيه و حاولت نرجع بس مفهاش فايده
ناري قايده .. و الدنيا كلها بتفرح الا انا
نزلت لـ سابع ارض و انتي طلعتي لـ سابع سما
من بعدي ارتاحتي و عيشتي حياتك جمبه يعني في هنا
اختارتي مصلحتك بسهوله و هديتي اللي اتبنى
طُلي بالابيض طُلي .. خدتي قلبي و روحي و كُلي
مصعبتش عليكي لما شوفتي قدام عينك ذُلي
طب قولي .. مين في الدنيا دي حبني قد امي
كله بيبعد عني و مفيش حاجه غير حُزني بتدوملي
--
كله بيزعلني و بيرجعلي اما بيحتاجني
انا مين دلوقتي ده انا بقيت الجاني عليه و المجني
كلموها عني .. قولولها ازاي عني بتستغني
و اتهني .. اديني عشان اطلع زعلي بغني
-
غمضت عيني و اتهيألي انك لساكي جمبي
ازاي طب هو انا بحلم ولا ده وهم جوه عقلي
لسا بيتهيألي .. طيفك جمبي و عمره ما سابني
و اتهني .. ياللي اتفصل من فستانك كفني
--
بقيت لوحدي .. مفيش ولا حد جمبي
انا اللي غلطت عشان فضلت في كل حُزني بخبي
و ايه اللي نابني .. غير وجع في قلبي تعبني
كدبت لما قولت نسيتك .. حضنك وحشني
فرحانلك بجد .. كل زعلي كان على نفسي
في اوضتي انا ببكي لوحدي مسمعتيش تنهيدي و همسي
محكتيش لحد و قولت اداري محدش هينفعني
حتى اللي بيسمعني بكرة هيزهق و يبطل يسمعني
غلطت عشان بحبك .. كان لازمته ايه بقى كدبك
اديكي بعدتي .. و اديني بحزن كل ليل بفتكرك
دموعي بتنزل و الايام و الذكريات بتقتل
الدنيا دي ظالمه نفسي لمره تيجي معايا و تعدل
يا بنتي .. انا قلبي ميت من اول ما بعدتي
لما جم سألوني جيبت العيب عليا مقولتش سيبتي
خططتي صح و في تمثيلك فكرتي و ذاكرتي
عايز منك اخر طلب امسحيلي ذاكرتي
التعليقات