مساحة إعلانية
بتقلي انت قلم ف بدور بكلامي
بكتبلك قصتك يعني لو تحمليني بهالأنامل
وين منوصل غير لعنا بعد المشي و الملامة
وين بتوسع كل كلمة غير بالحكي و الملامح
قلبي ولد و الليل خزانة و مكمن ان برد
و الولد ولهان ، مسمي وشاحك بلد لو هام
جلدك مساحة سرد و أوهام
أرض بكر و كفوفي رحالة
و القلب جيبة كل ما سرقت نظرات
طب افرشيلي بحلمك ليلة
كل يوم بتنامي بحلمي
عيسى ع لسانك يا زينة ؟ كيف بتردي الروح بكلمة ؟
قولي كيف بروض النار يلي بحملا و بتجرني ؟
كيف بدي الحزن اجليه ؟ يعني بصحنك بوح بحزني !
طب بصحتك و ما همك
خطي زي بحرك باهت ف تعلمت كل ما اكتب غمق
و علق أمالي بهالخزانة و قميصك
و اشرب كل المي يلي بالقزازة و ما غيثك
و شعرك على كتفك نهر ، ايدي بياخدها بسبيله
على كتفك نهر ، ايدي باخرة أو سفينة
آخ لو تنصفيني ، كنا منروي ليلك
و صدقي لو قلبك صحرا ، كنا منبني خيمة
لو قلبي بصحنا ما كنت رح ابدي خيبة
كلنا من تراب ، بس مش كلنا منملي عينك
كنت بصرلك غيمة و لو حرام كتفك بشرب
و لو انه لمسك ريح بسفينة كفي بشرع
بكتب عن ربيعك على وراق صفرا بهذي و بخرف
قلبي ولد متسرع ، بيبني و بيخرب
بيومي و بيهرج و بقول ما حلي أوعى
و كل ما أنجذب لجنتك ، التفاحة بحلقي توقع
و اذا فش موسيقى بهالأوضة بسمعك كصوت الجاز
فش موسيقى و اذا معك برقص على صوت الجار
و أنشر تيابك على خيوط الضو يلي طلت
بسكر الشباك و برمي هالخزانة برى
التعليقات