مساحة إعلانية
لمّا بسمع الموسيقى
بَشوف الدّنيا بألف طريقة
بركُض مرّة بقَلب البيتْ
مرّة بكزدر بالحديقة
مرّة بنفخ بضوي شمعة
ومرّة بطفّيلي حريقة
مرّة بعضّ الأسد
مرّة بلعب مع صديقة
لما بِسمَع الموسيقى
بِشوف الدنيا بألف طريقة
بُركض مرّة بقلب البيت
ومرّة بِكزدر بالحديقة
مرّة بُنفخ بِضوي شمعة
ومرّة بِطفّيله حريقة
مرّة بعضّ الأسد
مرّة بلعب مع صديقة
بلاقي كلشي بالغناني
زي الناس الي بالشارع
كائنات كبيرة وحلوة
وأنت صافن شايف سامع
بمشوا نغمات وكلمات
تقعد تطلّع عليهن
بلحقن ع قلب القصّة،
بشوف العالم من عينيهن
بسأل ليش وكيف ووين
أنا زي مين بدي أكون؟
وكل مَ بلاقي الأجوبة
بنفخ منها بالون
يطير مرّة فوق الغيم
ومرّة يهدي بمغارة
يُمرق حد قلعة عجيبة
وبين رفوف دكانة الحارة
مرّة بكبر قد الشمس
ومرة بنفّس،
يلا خسارة!
مثلًا مثلًا من كم يوم
شفت لمعلم سندباد
راجع تعبان بس مكيّف
من مشاويره البعاد
بعيونه نهر ع ظهره جبل
بحكي معي بكثير لغات
حامل خرايط وضايع فيها
يقلّب بين القارّات
كيف سافرت هاي المرّة؟
بطيّارة ولا كزدورة؟
أبحرت بسفينة ضخمة
ولا كفّتك شختورة؟
تمشّيت عَ طريق القدس
طرت ورقصت بالبرازيل
جدّفت بنيل السودان
شفت الأسوار بإربيل
جبّتلك غناني وأسرار
أكلات وأواعي جداد
جبتلّك بحر من يافا
وألف ليلة وقصّة من بغداد
شو يعني ساحل العاج
مسمعتش فيها بعرفهاش
طب قلّي بتعرف شي مدينة
فيها الألعاب ببلاش؟
بعرفش لازم انت تدوّر
تيجي معاي المرّة الجاي؟
بطلب من حلا بسوكليت
وبتقدر تركب وراي!
خلص، اتفقنا يا معلّم
أنا كمان بدّي اسافر
وأرجع كل يوم عَ البلاد
ويقولوا أجا المُغامِر!
مرّة من شي أسبوعين
شفت زلمة عم بنبّش
بين الكتب شو بساوي؟
قمت سألته بس مردّش
ولمّا قرّبت ع كتابه قلّي...
استنى عم بفتّش… عم بفتّش..
سألته على شو عم بتدوّر
"بدوّر ع الحقيقة،
بسأل ببحث بقرأ بسجّل
وبجمع معلومات دقيقة..."
سألته شو بدك تعرف؟
شو عازتها كلّ البلشة؟
اتطلّع فيي زي المش فاهم
وقلّي: بدّي أعرف كل شي
رياضيّات وفيزيا وتاريخ
عن الضفادع عن المريخ
أعرفلي شي ألف حزريّة
كلن جوابهن بطيخ
أفهم بشغل السياسة
بلكي أساعد ناس منيحة
وأتعلم شغل الفلاح
وكيف أشفي بسّة جريحة
بدي اتعلّم ابني عمارة
واعمّر موقع ع الانترنت
أتوقّع شو جاي بالمستقبل
وأجمع ذكريات الست
طب خليني أبحث معاك
دخلك انا شو ناقصني؟
بتعرف تقرأ؟
عم بتعلّم!
والله يا ريت، بتنقذني!
شي مرّة بالمستقبل
راح أشوف أم الشمس
يمكن أناديها بصوت عالي
يمكن أحكيها بالهمس
الدنيا وردة يا فهيم
وأنا بسقيها ضوّ نهار
وفاتحة التلفزيون وبحضر
شو بجيبوا بالأخبار
وكل ما شفت خبر بزعّل
بحكي إنّه بكرا أحلى
وإنه كل وردة خجلانة
آخرتها تفتّح ع مهلا
في حاكورة أم الشمس
شفت بنت أسمها أمل
مرات بتقول أشياء ذكية
مرات بتحكي هبل
منلعب دايمًا مع بعض
ولا مرّة بحس بملل
بس كل مرة بضربلها الطابة
بتطيّرها ع الجبل
ودايمًا بآخر النهار
بشوف الطابة بتتدحدل
من الكرمل ع البحر
وبالميّ الطابة بتتبلل
بس مش راح تغرق ولا مرة الطابة
بكرا منلعب زي الأمس
لأنّه بساعة الشروق
بترجّعها أم الشمس
مرّة وأنا نايم لاقيت
فنانة بتصنع أفلام
شغلتها تجمّع الصور
وبتنسج منها الأحلام
تعال تعلّم على الكاميرا
كيف منتصيّد الضو
وكيف منسجّل حكي الشجرة
والبسّة تجاوب عو
سألتني: بتعرف تمثّل؟
قلتلها طبعًا، شو يعني؟
كل يوم قبل المدرسة
بقول بطني عم بوجعني
قالتلي: مش هيك بالفنون
هون منحبّش نكذب
دوّر على قصّة في قلبك
أرسم غنّي وأكتب
مرة زمان وأنا صغير
شفت حالي بالمراي
فجأة تحرّك القزاز
وقلت يا ساتر شو لحكاي؟
لما أتطلّعت لفوق
شفت زلمة كلّه مرايا
جسمه بورجيك الصور
والصور تسرد حكايا
عيونه برضه كانوا مراي
بس مراي مش قزاز
لما شفت حالي فيهن
كنت أضحك بالبرواز
كان يشوف كلشي حلو
والعالم ملوّن عليه
يتمنالنا شو منحب
بلا م مرّة يسأل ليه
بس أنا إسا ودايمًا بسأل:
انا زي مين بدي أكون؟
وكل م بلاقي الأجوبة
بنفخ منها بالون
يطير مرّة فوق الغيم
ومرّة يهدي بمغارة
بمرق حد قلعة عجيبة
وبين رفوف دكانة الحارة
مرّة بكبر قد الشمس
ومرة بنفّس، يلا خسارة
لما بسمع الموسيقى
بشوف الدنيا بألف طريقة
بركض مرّة بقلب البيت
ومرّة بكزدر بالحديقة
مرّة بنفخ بضوي شمعة
ومرّة بطفّيلي حريقة
مرّة بعضّ الأسد
مرّة بلعب مع صديقة
بلاقي كلشي بالغناني
زي الناس الي بالشارع
كائنات كبيرة وحلوة
وأنا صافن شايف سامع
بمشوا نغمات وكلمات
بوقّف أتطلّع عليهن
بلحقن ع قلب القصّة
بشوف العالم من عينيهن
التعليقات