مساحة إعلانية
في كل عرق من عروق الارض عرق يحبها
ينبض خضار لعشقها ولعيونها يزهر طرب
وليا صطى برد الجفا فيني ولهت لقربها
يا حضنها يا حضنها يا وجد ذاك المغترب
لو الدموع اللي ملت كاس الغياب أصبها
سال المدى يمه ضما وضي الفضا شح وغرب
ياما بهجعات الملا ناجيت ربي وربها
يارب من لي غيرها روح وشرايين وهدب
هي قلبي اللي من بعيد يدق وانا قلبها
يا قلبها حسبي على اللي كان لأوجاعك سبب
دنيا خذتني وين مادري وأوهمتني بكذبها
وصدقتها يمه ومشيت ولا لقيت الا التعب
غربه ورا غربه غرقت بشرقها وبغربها
لا ساحل عني درى ولا مركباً مني قرب
الناس لا ما تغيرت الناس هذا دربها
محداً لحد يمه وتدرين لا غرابه لا عجب
صار الوفا تاريخ تقراه العرب في كتبها
وأهل الوفا الوافي بهم لا مالت الشمس أنسحب
الناس في قاع الحياة الله يفرج كربها
اللي من الحمل أنكسر واللي من الضيقه هرب
وأنا مثل هالناس يمه صابني ما صابها
وان صابك الحزن أغفري هذا نصيباً وانكتب
سافرت أدور عن سمو النفس عن مرقابها
ما صيدي الدنيا وطين الارض ما هو لي طلب
حراً وسربي غير عن ذيك الدمى وأسرابها
مالي سبوق ولا عشقت من الفجوج الا الرحب
دنيا البشع خليتها لذيابها ولأنيابها
ومالله خلق هذا الجناح الا مظله للسحب
اقول للي يطلب العليا ويطرق بابها
انت الكفو وأقول للي عذرب العز أتعقب
كرامتك أول وتالي لا تهد أطنابها
ولو عاثت الريح وجفتك المزن او قل الحطب
والرجل وان شاك الثرى رح للذرى وأرقابها
والذات جنبها طريق الذل وأسجد وأقترب
ان رحت روحك ما تروح انا ولد محرابها
اروح يمه بس أفوح بعطرك اللي ما نضب وان جيت أجيك أضم كفينك وأشم خضابها
يا أعظم أم لقدرها طاحت له إجلال الشهب
التعليقات