مش باقي مني غير شوية ضي في عينيا
أنا هديهملك وامشي بصبري في الملكوت
يمكن في نورهم تلمحي خطوة
تفرق معاكي بين الحياة والموت
مش باقي مني غير شوية قوة في إرادتي
حسبى عليهم وانت بتخطي
مش باقي مني غير شوية ضي في عينيا أنا مش عايزهم
لو كنت يوم هلمحك وانت بتوطي
في معركة ما فيهاش ولا طيارات ولا جيش
وانت في طابور العيش
بتبوسي إيد الزمان ينولك لقمة
بتبوسي إيد الزمن ينولك لقمة
من حقك المشروع مش باقي مني غير
شهقة في نفس مقطوع
وانا صوتي مش مسموع
يا حلمنا الموجوع
من المرور ممنوع
وانا صوتي مش مسموع
يا حلمنا الموجوع
من المرور ممنوع
مستني لما يمر موكب سلاطينك
مستني لما يمر موكب سلاطينك
ومش باقي مني غير شوية كفر بشروقك
على شوية رحمة من طينك
على شوية صبر من دينك
مش باقي مني غير شوية لحم في كتافي
بلاش يتبعثروا في البحر
ومش باقي مني غير شوية لحم في كتافي
بلاش يتحرقوا في قطر الصعيد في العيد
بلاش لكلب الصيد تناوليهم
خدي اللي باقي من الأمل فيهم
وابني لي من عضمهم في كل حارة مقام
وزوريني مرة وحيدة لو كل ألفين عام
ألم الجراح يتلم
ومش باقي مني غير شوية دم
متلوثين بالهم
مرين وفيهم سم
ومش باقي مني غير شوية دم
مقدرش أسقيك مواجعهم
وبردوا مقدرش أرميك وأبعهم
يمكن في مرة تطلبيني شهيد
هحتاج يوميها الدم
هحتاج يوميها الدم
يمضي على شهادتي
التعليقات