بالبال رح بتضلي قد ما تعجق بالاشخاص
النسور رح بتعلي العصافير بالقفاص
الذكرى ما بتموت ولا بعمرا بتختفي
قد ما توه بالبحور المنارة ما بتنطفي
سفينة بلا شراع بس دفتها ما بتميل
قبطانا ما بيتوقف والرحلة الف ميل
صور عم تتستف عم ترسم ارخبيل
و انا ناطر عالشط عم بتخايل اساطيل
اضاليل اباطيل صدقني كلو اوهام
من بعيد شايف افق علقان بريشة رسام
شايف واقع ما عم يوقع عم يبوقع للاحلام
عم يتنازل عن الوعي بدو يقايضو بالمنام
والمنام بدو لجام عم يتفاوض مع كابوس
خايف إنو تمشي الصفقة وصفي لحالي محبوس
عجزيرة بالمجهول بلا شموس ولا فانوس
خيي بطل بدي كفي تعا شكني بدبوس
وعيني تإرجع نام بركي بفوت عن جديد
إرجع اقعد على الشط اسرد اطلع لا بعيد
بركي المركب عندي بيرسي وبتطفي هالفقصة
وإذا ما تغيير طقسي من الأول برجع عيد
بالبال رح بتضلي قد ما تعجق بالاشخاص
النسور رح بتعلي العصافير بالقفاص
الذكرى ما بتموت ولا بعمرا بتختفي
قد ما توه بالبحور المنارة ما بتنطفي
رح عيد مرح اتعب لو بدا تكلف سنين
بدفع عمري بس لحتى إرجع اشتري الحنين
الاحساس لذة ؟ أو مهرب مدمنين ؟
كربانين؟ ما تسمعني هل أنين
هتلك إبرة ذكريات تعا شكا بالوريد
بطل فيي اقعد عاقل هلق بلش التصعيد
التزويد لازم يمشي خيي صار وقت تزيد
الجرعة ما عم تاخد قولك صار وقت نعيد
حقناتي ماعم تخرق مش عم توصل لمحل
شراييني كلا مسكرة ومضيع مفتاح الحل
لا طيور عبلادها جايي ألوان الصور حلت
ملت مني الحكاية حبكت مني نحلت
خيوط الماضي فلتاني ابرة لبتخيطن طقت
لا بداية ولانهاية حتى كلماتي فلت
بقيت لحالي عالشط حابس لوعة التنهيد
خايف إنو يجي بكرا وما اقدر من الأول عيد
بالبال رح بتضلي قد ما تعجق بالاشخاص
النسور رح بتعلي العصافير بالقفاص
الذكرى ما بتموت ولا بعمرا بتختفي
قد ما توه بالبحور المنارة ما بتنطفي
التعليقات