كلمات اغنية دقة قديمة – الفول واللحمة

عن موضوع الفول واللّحمة صرّح مصدر بيه مسئول

إن الطّب اتقدّم جدًا والدكتور محسن بيقول

إن الشّعب المصري خصوصًا من مصلحته يقرقش فول

حيث الفول المصري عمومًا يجعل من بني آدم غول

والبروتين الكامن ضيّه نادر زيّه فـ أيّها فول

تاكل فخدة في ربع زكيبة والدكتور محسن مسئول

يدّيك طاقة وقوّة غريبة تسمن جدًا تبقى مهول

لحمة نباتي ولا في الحاتي تاكل قدرة تعيش مسطول

ثمّ أضاف الدكتور محسن إن اللّحمة دي سم أكيد

بتزوّد أوجاع المعدة وتعوّد على طولة الإيد

وتنيّم بني آدم أكتر وتفرقع منّه المواعيد

واللّي بياكلوا اللّحمة عمومًا هيخشّوا جهنّم ده أكيد

يا دكتور محسن يا مزقلط

يا مصدر يا غير مسئول

حيث ان انتوا عقول العالم

و العالم محتاج لعقول

ما رأي جنابك وجنابهم

فيه واحد مجنون بيقول

إحنا سيبونا نموت باللّحمة

وانتوا تعيشوا وتاكلوا الفول

ما رأيك يا كابتن محسن؟ مش بالذمّة كلام معقول!