مساحة إعلانية
علي طرف الكوكب المُنهار
انا وحدي هناك خايف
منيش مجبور ولا مُختار
منيش فاهم ولا عارف
ولسة جعان
كتاف عمري الوحيد بردان
حيطان واسعة وانا الآخِر
انا الآخر واحد هربان
انا الباقي في كون هالِك
ومُتهالِك بدون انسان
وكأن العالم فاتني في لحظة وتاه
وكأني في رحلة في الأزمان
وكأني ذهبت اشوف كوكب
لقيت صمت الفضا الشاسع سنين توهان
ولسة بواقي اصوات الحياة السابقة حواليا
آثار عالم من النسيان
معرفش هل في طاقة بحث
افتش تاني عن باقيين
افتش تاني عن صاحيين
افتش تاني عن صامدين في وجه الحرب
وعن فاضلين وِسط الهلاك والضرب
خارج شقتي وبيتي
وسط عالم من البراكين
ونيران الهلاك ودمار
بواقي الدم والانهار
بواقي الصمت الخايف
لعالم
كان ملو السمع والابصار
مين ده اللي داس بالجنون في زرار
فأنهي الحلم الباقي
وجلب الموت
وصحي المنَسِي والمكبوت
جعل كل نصيب الارض
كشارع الخوف في ليل وسكوت
وانا لسة هنا محطوط
بزود كتاباتي كمان واحدة
بدون ناس هيستمعوا
بدون مردود
او يمكن الاقيها هربانة
في يوم تايهة وحيرانة
من وسط العالم المخضوض
فاخدها في حضن
واحط خوفها علي خوفي
فيتقوي بقوة المربوط
ونهرب من وسط الرماد لشطوط
ونحكي تاني ونغني
وارويلها حاجاتي وتسمعني
ونقول مادمنا لسة هنا باقيين
علينا نصنع حياة تانية
ونخلق شجر من الياسمين
وكإن كل اللي فات ثانية
وكأن العمر قدامنا
وكوكب فاضي هيجمعنا
نملاه من تاني بالكلام والناس
لحد مانروح في سلام ونُعاس
علي أمل مايقوم يرجعناا ..
#ريمون_روماني
التعليقات