أنا مش فكراني
بس فكراك أنت
فاكرة ملامحك
فاكرة أنصاص كتير من صورك
و بقيت الصورة متاكلة
أو منغوشة
مكتوب في الظهر "أنا كنت هنا"
شكل الي جامبك كانت أنا
بس مش فاكرة
و مافيش حاجة واضحة
لا لون الروج
ولا حتى شكل الضحكة
كل الصور عبارة عنك أنت
فلاش باكس كتير واكلة مخي
صورة ليك و أنت بتقولي
صدقيني، عمري يا عمري ما همشي
و فلاش باك ليك و أنت بضهرك
ماشي بعيد
مش فاكرة حاجة يومها عني
غير راعشة ماسكة جسمي
و فلاش باكس تانية تعيد
صورة ليك و أنت حاضر
قاعد بتقولي حاضر
هاخدك و نروح نسافر
سامعة صوتي بيقولك
"بس بلاش ساحل،
خليها دهب"
أين الحبيب الذي وعد ؟
ها قد ذهب
فلاش باك
و إنت بركان غضب
و إيدي تلمسك فتهدا
كإنك أقمت مع حروبك هُدنة
ترجع ربيع
تصبح وديع
و تقولي: حاضر
هخدك و نروح نسافر
فلاش باك تاني
و أنت فاتح السقف
معلي صوت الأغاني
و باصص على النجوم
و تقولي أحلى حاجة في اليوم
لما السماء تكون رايقة
فا أنسى أني متضايقة
و أرد و أقولك زيك
صوت الأغاني عالي فا ماتسمعنيش
فلاش باك تاني و أنا بقولك أزيك
و أنت ماتفهمنيش
أنت مشيت
بس روحك ماسبتنيش
شايفاك كملت
بس أنا مش عارفة أعيش
و كل ما أستسلم للغرق
و أحس بنفسي بيتخنق
فلاش باكس تانية
تسحبني فوق المياة
و إنت بتسحبني نحيتك
و تقولي
خليكي كمان شوية
صورة لعيونك و هي بتلمع
و صورة تانية لنص وشك
و شفايفك بتبتسم
فيديو بطئ لضحتك و هي بتترسم
مش فاكرة إيه اللي ضحكك
شكلي كنت سرحانة في ضحكتك
بس أتمني إني كنت أنا
فلاش باك و إنت بتكتب في ضهر الصورة
أنا كنت هنا
سامعة صوتي جاي من ورا
بيقولك كده فاضل حاجة
شايفة عينك بتضحك
و تقولي مش محتاجة
مش محتاجة تفكريني
صدقيني
هاخدك و نروح نسافر
و يرجع فلاش باك و إنت بضهرك
شكلك سافرت لوحدك
الصورة ديه كاملة مش متاكلة
شكلي ماكنتش جنبك
أنا مش عايزاك ترجع
عشان عارفة إنه مش هينفع
أنا بس عايزة
ألاقيني
تعبت من التوهة
تايهة جوايا
تايهة و أنا معايا
مش عارفة أعيش معايا
فابنام كتير
كأني وقعت في بير
و لم أكُن بيوسف
فلم يعثر عليّ أحد المارة
تعبت من إني كل مرة
بقنع نفسي إن التوهة حلوة
إن ضللت عن الطريق
فكل الطرق تلائمني
هذا كذب
أنا أملؤني بلا معنى
أنا لا أصل
لا أصلني
فقطعت رحمي
نسيت نفسي
أصبحت أنت كُلي
فابحبس نفسي
أغلب الوقت
محبوسة جوه جلدي
و مش حاسة بالوقت
مش قادرة أرجع طفلة
و لو خُفت أجري أستخبي
تحت الملاية
لإن الوحش مش برة
الوحش جوايا
بياكل فيّا كل يوم
ماسبش مني غير بقايا
إنت معظمها
ولو حاوت أجمعها Buzzle
بتطلع صورة ليك
أنا إختفيت فيك
مش قادرة أفصلني عنك
مش فاكراني حتي قبلك
غيّرتني
عشان أكون أقربلك
و غربتني عني
أنا عايشة مع حبيبتك
و حبيبتك ولا حاجة مني
التعليقات