بنت جميلة
أحلامها بسيطة
كان نفسها تدوم
طفولتها السعيدة
لكن الموت قرر يفوت
عليها الليلة
هعيش أيام وشهور وسنين كتير بعديكي
وأقول ياريت لو كنت انا اللي رحت قبليكي
الزعل عمره ما قل
اللي مات مات راح وارتاح خلاص من التعب والذل
الألم مكانه حل
اللي عاش شاف الخوف من الموت يحلف إن عمره ما يكلّ
إني أكون وسط اللي نجيوا
لما نجّوا الروح بإيدهم
عايزة أطيّب جرح أهلي
نفسي أقدم شيء يفيدهم
مش هسيب الغدر يخطف
حد تاني من حبايبي
بالطو أبيض للملايكة
الملايكة أخدوا قلبي
نفسي لو بإيدي أقدّم ألف إيد وإيد تساعد
ياما قالوا ليا لأ ألف لأ وألف واحد
هنزل ع المدينة عارفة هلاقي فيها إيه
الإجابة لكل حاجة كنت يوم عايزة ألتقيها
هصبر ع المتاعب عارفة مهما أباعد
راجعة أكيد ف يوم للأرض اللي اتولدت فيها
راجعة أكيد للأرض اللي اتولدت فيها
ياما اشتاقنا ليكم من بعد البعاد
لازم هكمّل أنا وألحق عمري اللي فات
الأيام عمالة تجري
بس قلبي مش مفارق الماضي اللي راح وفات
مهما العقل كان بيشغي
بالأفكار وبالكلام
لسه بالي بيطاردني بالصور والذكريات
مش عايزة أشوف قبوركم
نفسي أشوف بيوتكم
عايزة أشوفكوا بشعر أبيض
مش بأبيض جوا تابوتكم
مش هتفرق كرّموني
أو اتغاضوا لمرة عني
بعمل ده عشانكم انتم
مش عشان حد يجاملني
سلام على كل روح فارقت حياتنا بمرض
في حزن جوا قلبي بس عمري ما قلبي إعترض
يا ناس ماتكسروش ضهري لو يوم إنحنى
حتى لو حصل أنا عندي ربي سندي أنا
طول عمري فيّا دافع إني أدافع عن طموحي
مش فارقة كتير معايا ولّا معايا بس روحي
مايهمنيش أنا أي حد إلا الغاليين عليّا
كلمة منهم قادرة تبني اللي هدته الدنيا فيّا
ياما اشتاقنا ليكم من بعد البعاد
لازم هكمّل أنا وألحق عمري اللي فات
ياما اشتاقنا ليكم من بعد البعاد
لازم هكمّل أنا وألحق عمري اللي فات
التعليقات