بعد السلام والمرحبة يا ولاد بلدنا يا طيبين
نِفرِش كلام المصطبة واضح لكل السامعين
مصر الحبيبة الطيبة أم البنية والبنين
إشحالها في عز الصبا واشحال ولادها المخلصين
وسط العواصف مركبة بين رَيح شمال وريح يمين
***
جابوا الطبيب ابن الحلال كشف ما خاف وشاف وقال
أهل البصيرة في البلد جواب لكل السائلين
قالوا البلد عايزة ولد يأخذ بثار المظلومين
ولد يعوِض اللي راح ويعلا فوق كل الجراح
ويمد إيده في الضباب يشدّ أنوار الصباح
فيكم ولد يا سامعين؟ أجدع ولد طب هو فين؟
وهو مين؟
إبن البلد يا ابن البلد الوقت وقتك يا ولد
يا قلب مصر ونبضها يا ابن البلد
يسري بطولها وعرضها يا ابن البلد
يا صبحها – يا ابن البلد يا ربحها – يا ابن البلد
يا قمحها – يا ابن البلد يا رمحها – يا ابن البلد
يا نور سماها وأرضها
يا ابن البلد يا ابن البلد الوقت وقتك يا ولد
***
آدى كلام المصطبة يا ولاد بلدنا يا طيبين
بعد السلام والمرحبة واضح لكل السامعين
التعليقات