كلمات اغنية عبد الحليم حافظ – بالأحضان

بالأحضان بالأحضان .... بالأحضان يا بلادنا يا حلوة بالأحضان

فى ميعادك يتلمو ولادك .... يا بلادنا وتعود أعيادك

والغايب مايطقش بعادك ... يرجع ياخدك ... بالأحضان

بالأحضان يا حبيبتى يا أمى .... يا بلادى ياغنيوة فى دمى

على صدرك أرتاح من همى .... وبأمر أشعلها نيران .... بالأحضان

ياما لفيت سواح متغرب .... وأنا دمى بحبك متشرب

أبعد عنك قلبى يقرب .... ويرفرف ع النيل عطشان .... بالأحضان

ياما شفتك ع البعد عظيمة .... يا بلادى يا حرة يا كريمة

وزعيمك خلاكى زعيمة ... فى طريق الخير والعمران

اتقويت ورفعت الراس ... وبكيت فرحة وشوق وحماس

وبقيت ماشى فى وسط الناس .... متباهى بوطنى وفرحان ... بالأحضان

بالأحضان يا مصانع يا مزارع .... بالاحضان يا حصاد الثورة يا حلم وعلم

بالأحضان يا مداين يا جانين .... بالأحضان ياللى انت بترفع رايه السلم

نور عينى وحبايبى ... وعزاز قوى على قلبى

ياللى على الجرار وقصاد لهاليب الصلب .... يا سواعد عربية ونفوس حرة أبية

يحميكم وتدوم الهمه ويحيا الشعب .... يحيا الشعب

يارب العزة والقدرة بناديك ..... يارب

فى صلاة العيد عيد الثورة وأناجيك ..... يارب ..... يارب

اللهم انصر بلدى وأيدها ..... ثبت خطوتها وخد ايدها

يارب اجعلنا نحقق كل خيال ..... أمين

واجعل يومنا الواحد بكفاح أجيال .... أمين

فجر ينابيع الخير تحت أقدامنا .... أمين

المستقبل خليه نـور قـدامنا .... أمين

اللهم انظر لعملنا وبارك فى جهادنا ونضالنا .... واحفظ ريسنا وبطلنا