مساحة إعلانية
قصّتنا مثل شفِّة وسكي بعد لقمة روكفور
قصّتنا مثل ابن الشيخ لما تعلّم يكفر
سيجارة حرقت غابة خضرا وحلوة بعز الصيف
فراشة طارت عن الميسم هدّت على السيف
قصّتنا فلم وصورُه بشعة، عملنا ساوندتراك أحلى
قصّتنا من زيت السنة مصبوب ع حمّص
قصّتنا زي البحة يلي بصوت أبو وديع
قصّتنا بعدا بتثلج مع إنّه الدنيا ربيع
ولد ضايع من أهله بنص مسيرة العيد
كلمة تذكرت اقولها بس بعد ما صرت بعيد
زلمة طاش بشبر ميّ وغرق بجرن الكبّة
كلب دعّس بالباطون بعد ما خلّصنا الصبّة
قصّتنا حيّة بثلاث روس كل راس لابس طقيّة
وحدة أديداس وحدة صوف وواحدة عسكريّة
كسرنا طقم صيني طلع من صنع الخليل
صدّقنا إننا عنجد عشرون مستحيل
قصّتنا باربي بعد الانتفاضة صارت فلّة
الرحلة بهرتسليّا التشيك إن بالأرض المحتلة
قصّتنا تشرمندر بس حابب يشتغل بالمطافي
والأشكنازي بهآرتس بقيّم بلكنافة
قصتنا علماني مقربط بمحكمة شرعيّة
قصتنا بطرك باع كل أملاك الرعية
خلطنا الحابل مع النابل طلعوا نفس الشي
قصتنا موظف فاسد مش ملاقي مين يرشيه
قصّتنا بوظة مرّة ونقطة تباسكو بالقهوة
فستان عروس انحرق بمكوى مولّع ع سهوة
حفرنا حفرة لأخينا لاقينا فيها عظام
قصتنا باخت جدًا زي نكت عادل إمام
قصتنا فزعة وصلت بعد م خلصت الطوشة
قصّتنا صفحات الجريدة تلزّق بالمنقوشة
قصتنا نزلت على البحر رجعت مع جفاف
قصّتنا عرس مسكّر شارع قدام الإسعاف
التعليقات