كلمات اغنية فرج سليمان – نشيد عربسرائيل

يا نهر بركض محلّه

من الطيرة لعرب الخوالد

في مقهى ع طراف النهر

بَمرُق بلاقي حالي قاعد

يا نهر بركض محله

يا حكاية إبريق الزيت

حامل قوارب الي ضلّوا

يستنوا الفرح بالبيت

يا نهر بركض محلّه

يا جذر مشتاق لبذره

يا غايب ما أخذ إبنه

لكن حامل ع ظهره عذره

يا نهر بركض محلّه

يا نافورة بحوش الدار

يا مَيّ ما إلها زمن

والزمن بطفيش النار

يا نهر بركض محلّه

يا تعليلة بلا نهاي

يا ريح التعب الي رايح

يا وجع الراحة الي جاي

يا نهر بركض محلّه

يا مسلسل بخلصش

يا ولد نازل ع شط

بس إمّه قالت تغطسش

يا نهر بركض محلّه

يا مدى مجعلك حزيط

يا سفينة بقلب متحف

ما عرف خشبك محيط

يا نهر بركض محله

يا كسل الشتا القديم

يا صلاتك يا محمّد

واحنا ع بواب الجحيم

يا نهر بركض محلّه

يا عرق ع جبين أبوي

يا شجاعة تصير رعبة

كل م عم بكبِس سموي

يا نهر بركض محلّه

يا صدى جسر الحديد

بعده حاوي فوقك واقف

يسأل ع الشرق الجديد