(Lefty-M)
في مصرالبنت بتتولد بتبقى ملك لأهلها
مش من حقها تاخد أي قرار لوحدها
أوتختار شريك تكمل معاه بقية عمرها
خلوا الواقع مش واضح و أحلامها مشوهه
فبتصبح ثمره من شجره مقطوفه قبل ما تستوي
فبتنحني بتتهد معاها أحلامها اللي بتبني
فزاد الكَبت عندهم وبدأ العِند لأهلهم
مايطيقوش وشهم فملأ الكُره قلبهم
الإجبار …خلي التعند زاد
التشدد والتحكم بيخليها تزيد عناد
كفايه تغصبوا كفايه تجبروا
كفايه تجبروها دفنتوها وبإيديكم بتردموا
(ZigZag)
خلقتوا بنت بتندب بختها المايل
عاملتوها عكس ما الكتاب قايل
دفنتوها في سجنكم تعيش
والسجن ساكنة العنصرية بين الولد والبنت
ده مباح دي مفيش عدلكم مايساويش
الخوف خلق جواها سؤال مين قال كبت الحريه حلال؟
(Lefty-M)
عانس كلام الناس إنتي بنت مايصحش غلط
خلقتوا بنت مريضه نفسيه متشبث فيها المرض
كل أم عايزه إنها تجوز بنتها
مش مهم مشاعرها حبت مين ومين حبها
ما إللي بيدفع بيشيل واللي حبته فقير
علقتوا كل شيئ علي القسمه والنصيب
خلوا في علمكم كبت حريتها هايزود معاندتها
هتعمل إللي عايزاه ولومحبوسه في أوضتها
عامينها وبتسوقوها تفضلوا تقنعوها
إن البنت مصيرها بيت جوزها بعد بيت ابوها
ماتلبسيش ماتخرجيش غطي الشعرالسايب
حبل الأمل دايب صغيره فالسن والشعرشايب
(ZigZag)
ممنوع أحلامها عنيها تشوف
بيموت جواها جنين مالخوف
في شرع مين مفيش أمين يصون بنات طيبين
ممنوع تشوف أحلامها النور
بانيين حواليها ألف سور
والعدل غاب كل ما زاد السكات
(Lefty-M)
قاعده ليه لوحدك في العتمه ومكشره
من كتر بكائك واكتئابك ملامحك متغيره
حُرة مش سلعه فيكي يبيعوا ويشتروا
تنشف الميه في الريق فاكشفي وشوش اللي اتلثموا
خايفة تتكلمي فابتسكتي لا يعاقبوكي
إنتي ضوء شمعة لو سكتي هيطفوكي
إنتي إنسانه كامله الأهلية مش محتاجه وصيه
مسئوله عن قراراتك ليكي مُطلق الحريه
إنتي أقوي منهم إنتي أقوي من الظروف
انتي عين بتشوف مفيش مجال للخوف
ماتضعفيش إنتي أقوي منهم ماتستسلميش
ماترضيش بوضع إتفرض عليكي ماتعيطيش
(ZigZag)
وجودك أساسي وبيكي الحياة
أجمل بوجودك إنتي
بلاش يوم تنحني
سكوتك مش ضعف ولا انهزام
قومي قاومي إمسحي دمعك يا ملاك
وجهي بلاش تنطفي
التعليقات