مضى عمري واحلامي تسابق فيني اوهامي
ولا اصدق منك يا ايامي مادام انك تصحيني
من الاوهام والصدمات ومن لا قدر الوقفات
ومن خابت به الهقوات وكل غلطات تنهيني
تعبت وصرت متساهل اعيش الوقت متجاهل
ثقيل الدم والجاهل وكل من لا يراعيني
تبعثرني خطاوي ليل مسامرها يهد الحيل
اذوق المر اذوق الويل وحالي دوم مشقيني
علي يا دنيتي حني اعيش بعالمي كني
غريب ودوم متمني وطن في قلب يحويني
من الضيقة من الحرمان من القسوة من الهجران
تعبت بعالمي عطشان ابيه الوصل يرويني
وشفتك بالسما نجمة تطالعني ومبتسمة
ملاك الكون لي نعمة عن العالم بتغنيني
فتنتيني بتفاصيلك جذبتيني باساليبك
سحرني طهرك وطيبك قلبتي كل موازيني
احب الكون بافراحه ولو حسراتي مجتاحة
حياتي ودوم ذباحة طموحاتي بتكفيني
ولا اجمل من طموحاتي مادامك كل غاياتي
ومصدر كل راحاتي بهمسات تسميني
حبيبك نبضك انفاسك نظر عينك واحساسك
وتاج مزينه راسك يا كل الزين في عيني
اشوف الكون بعيونك جميع الناس يفدونك
ولو خانوك ما اخونك مادامك من تداويني
من جروح تعذبني وكل حسرات تسلبني
من الراحة وتكتبني اسير الحزن يفنيني
اشوفك جوهر نادر بهمي وحده القادر
يبدد حزني الصادر من اعماقي ويشفيني
حنان الكون باعماقك اشوف الحب باحداقك
واحاسيسك واشواقك تموتني وتحييني
يا نصفي الثاني بين الناس والاول انتي له نوماس
يا دره يا ذهب يالماس ياصفحاتي وعناويني
جمعتيني من الماضي وصرتي الخصم والقاضي
تبيني بحكمك الراضي بفعلي بس جازيني
نا عشتك بعمري حلم وصرتي في حياتي علم
غيابك عن عيوني ظلم طلبتك لا تخليني
يا نجمة صرتي في يدي حدود اليوم ما عندي
ولا يوقف ابد حدي مادامك من تقويني
ولو عشنا العمر عمرين احبك عشق بالاثنين
ولو عادت سنيني اسنين عشقتك لاخر سنيني
التعليقات