الصدور أطرافها متراميه والليل هادي
لا يروح الليل قبل أستنطقه وأخذ جديده
كل ما سقت القدم بين المبادي والمبادي
اعترض لي طاري الشوق وخذيت الشعر بيده
أرتجل للشرد من الصيد عن صهوة جوادي
وأعتق اللي من سهوله صيدته كلاً يصيده
لاخذتني غايتي وابطيت يا غاية مرادي
والمسافة كايدة والحب باقي له شريده
احتريني والبسي لي كل لون الا الرمادي
الرمادي كل ماشوفه عرفت انه مكيده
ودّي أضحك من بعد طول المعاتب والتمادي
ضحكة اللي يضحك من أدناة حاجه من حفيده
زمّليني من هواجيس الغياب الّا ارادي
إن ذبحني طاري الفرقا وش أنتي مستفيده
أعبري بي لا غدي عادي وأنا مانيب عادي
الحريص تورده للموت غلطته الوحيده
يا عنيده مامعي صبراً مثل صبر المهادي
لا تعذرّتي مثل عذر المعقّد بالعقيده
في رجا الله ما يخليني لجّدي واجتهادي
مارجيت الا وعده ولا خشيت الا وعيده
لا استوت في عيونك الثنتين قربي وابتعادي
والظروف أقسى من الماضي على اللي يستعيده
المصافح فالقلوب أصدق من مصافح الأيادي
اسمحي لي كل يوم أصافحك وأنتي بعيده
لا تحاتين الضمى والجوع في رحله جهادي
الحظوظ مقسّمه والذيب ما ياكل وليده
شاعرك لا هامو أصحاب الشعر في كل وادي
مستعد يوقّف الدنيا على مطلع قصيده
التعليقات