مساحة إعلانية
تشرب شاي
شكلك كدا بتحب الشاي
بالذات لمّا الدنيا تبرّد
معلقتين سُكر ولا ازيّد
ولاّ ابعت اجيبلك مستورد
المحلى ما بيسكرّش
مهما تقلّب يفضل مُرّ
مش إيد واحدة ما بتصقفش
ازاي نسمع صقفة تسّر
خد بالك الكرسي ملخلخ
أصله بقاله سنين
مش حُرّ
اتفضل لـ الشاي كدا يبرد
ما اتعرفتش بيك
طب صدق شكلك بقى عربي
باين م اللي فيك
مصري
سوري
ليبي
عراقى
ولاّ فلسطيني ومش لاقى
حد سمعلك خبط
معلش مفيش قهوة زيادة
مالك ساكت زي العادة !
انت منين بالظبط ؟
لو وقع الكرسي دا مش ذنبي
ماتقوليِّش .. يلاّ النبي عربي
قلت ما فيش مطرح ع الأرض
انت مسلم
ولاّ مسيحي
مش مهم
المهم نونس بعض
أنا اسمي يا سيدي محمد
مواليد السبعينات
أول ما وعيت ع الدنيا
اتقتل السادات
وما كنتش فاهم ومازلت
منا لو كنت ساعتها فهمت
كنت هاجرت
ولا استعجلت
ومن بطن امي بسرعة نزلت
اشرب اشرب
وما تتهزش فوق الكرسي وبطل فرك
إلاّ ايه رأيك فـ اللى اتقال على حرق المصحف فـ الدنمارك
طب وحياة من خلق مُحمد
وانا قدها مش إسمى محمد
كنت عليهم اهد المعبد لو على راس جيشهم جان دارك
بس المصحف حافظ نفسه ومش محتاجلى
شُفت أديك وقّعت الكرسي كمان على رجلى
يبقى لا كُرسي
ولا ع الأرض
التعليقات