أسمع كلامي لك يا ناصر وانا أبوك
من قبل صعبات الأمور اتشابه
مثل الذهب حكي إلى جاك مسبوك
تجارب والعمر فاتح كتابه
ترى الليالي بين هقوات وشكوك
مابين عدلات تجي وانقلابه
أحسب حساب الوقت لا يبرك بروك
مهما صفى لابد تحسب حسابه
قبلك اباطرة وسلاطين وملوك
الكل عقب العز وقته غدى به
وسلاحك اما صار جاهز ومفلوك
والا تجيك من الليالي أصابه
ودرب العمر وعر ومليان بالشوك
ولا يسقي الضميان شوف السحابه
وان جاتك العسرات لا تصير مضنوك
دنياك تبغى قوم عزم ومجابه
فل الحجاج وكل ما فات مدروك
ومنك الدعاء والله عليه الإجابه
وذخرك ولد عمك وعزوتك في أخوك
وأطيب جمالات الرجل في القرابه
حذراك ماء وجهك الى صار مسفوك
يصير مالك بين ربعك مهابه
ولا تصير عبد المال والعبد مملوك
المال محدن ياخذه في ترابه
وما هوب رأس المال ما ترصد بنوك
الطيب رأس المال في كل جابه
ترى الغنى ما هو عمارات وصكوك
أغنى غناة الرجل لا فتح بابه
وش فايدة قصره إذا الباب مصكوك
الله يسعى للقصر في خرابه
وأهلك وجداًنك على الطيب ربوك
والرجل ما يطلع ترى من ثيابه
وأهل المصالح حط بالك إلى جوك
دو خلا لا يخدعك في سرابه
إن فزت قالوا يا ولدي ألف مبروك
وان طحت محدن مسك دونك نصابه
ولا تماشي كل نذل وصعلوك
ماش الذي في مشيته يقتدى به
خلك فطن لو قالوا الناس حبوك
وان لم تكن ذيب كلتك الذيابه
والعز بالطاعات تكفى وانا ابوك
ولا ينفع الشايب الى أقفى شبابه
التعليقات