مش طايق نفسي وصهدان
مستنى النسمة تيجى تهل
وملزق وكمان عرقان
وكأني فرخة على جريل
دانا لما بخش اخد دش
جسمى ياعيني بيعمل تش
ودماغى تطلع دخان
بلونة هتموت وتفش
حر يسيح بيضة كيندر
دانا جبت خلاص وش سلندر
بنهج ومسقط وبنقط
والكهربا قاطعه ومتكدر
قلت اطلع عالسطح طراوة
الصهد أتمكن بغباوة
ونزلت اتكفى وماقدرتش
بينى وبين الحر عداوة
ناقص ارقد ف التلاجة
المروحة لابتعمل حاجه
ولاعارف اقعد عالكرسى
ده كأنى ولعت ف صاجة
مش عارف اتنفس دى رطوبه
خانقانى كأنى بالع طوبه
والهوى واقف لابيتحرك
كان ماله امشير او طوبه
عشاق الصيف هنا تعالولى
اخباركم ايه يلا قولولى
لو هلمح اى واحد منكم
هعمل وياه الصح بطولى
مش عارف سجلت ازاى
مش عارف حتى اشرب شاى
انا عايز اكمبر ف البانيو
والتلج يكون رايح جاى
التعليقات