دنيا.. وناس.. فى التوهة متبعترة!
أحلى ما فى الدنيا دى إيه يا ترى؟
حاجات كتيرة.. كبيرة.. وصغيّرة
شمس.. وقمر.. ونجوم.. وميه.. وهوا
وقلوب تدوب ما تتوب فى ليل الهوى
وعيون تضم الكون.. وتحلم سوا
حاجات لا هى بتنباع ولا بتنشرا
اللى تقول ان الحياه جاه ومال
حاسب لا تبنى قصور رمال.. ع الرمال
ايه يفيد المال.. إذا الدهر مال
اللى خسر روحه.. وطغى وافترى
اللى تقول ان الحياة مال وجاه
حاسب لا تتشرد فى كل اتجاه
الحب هوه وبس بر النجاه
وأحلى ما فى الدنيا.. مهما جرى
وايش بعدها لك؟ مالك ومالنا؟
يا دنيا حالك.. فاق احتمالنا
ولا صنتى مالنا.. ولا جمالنا..
بس احنا لسه.. حاضنين آمالنا
وأملنا فى الحب.. لو شَملْنا
نحب روحنا.. الحياة تاخدنا
فى حضنها.. والحنان يسودنا
وأد ما ندَّى.. أد جودنا
يجود وجودنا وييطيب عملنا
نحن ناسنا.. الحياة تزيدنا..
حياه.. وناسنا تاخد بإيدينا
ينفك قيدنا.. والنور يقيدنا
ويقيم ساعدنا الجنة فى رمالنا.
التعليقات