ما فيدي صنعة مانا قاري وليام بيا تجري
كنشوف الزمان مغنزر فيا ونيابو تبري
ما عندي على من نتكل حيت أنا غير ولد بوبري - فقير
كان فيدي حل واحد هو نبيع ونشري
نية ديالي كانت صافية بغي نجيبا بالحلال
وقفوا معايا الرجال سلفولي راس المال
دبرت بلاصا فالأرض وبديت كنتحرك
كل نهار ونهارو حسن ما نبقى مورك
واحد المرة ما فهمت والو شفت السوق ترون
بنادم جاري داخل فبعطو كلشي وجهو تلون
بنادم جا لا سلام لا كلام وبدا كيتشوت فرزقي
تلفلي الكلام فحلقي مقدر تشي نسمح فحقي
مفتنطشي كيف ضربت ودارو بيا وبديت كنلقي
خلاو دمي فالأرض عبرة نلي باقي
طلعوني نسطافيط مقطن فحال شي كريمينال عكل
وأنا غير مواطن مرضاشي يعيش فالذل
شني باغيين هاد الناس شني باغيين مني ؟
بغيت نبيع ونشري فالحلال جاو كاع ما خلاوني
وليت كنبزنس غير فالحرام جاو نالحبس داوني
ملي شبرت فطريق الدين ولاو يخافوا مني
خرجت من الحبس حماق مريط فبنادم نلصق
حرفالي كيفاش غادي نعيش فبلاد القانون بلا حق
جبرت العز كيجي فالزنقة غير بالصحة و الدق
نهار على نهار كنشوف راسي فدموع الناس كنغرق
كيفاش غادي ندبر مصيريف بلا ما نخرج نسرق ؟
جبرت البيع و الشرى فالممنوع فيه الفلوس بلا عرق
الحشيش، الدروكا، الهروين، الكوكا
أي سلعة بانت جديدة كتخربق السلوكا
وليت موسوس حيت متبوع ديمة موقف الشوكا
ما عندي بلاصا كنشوف جميع القنوت مشكوكا
حماقة الحنوشا شوفات دبركاكا مفروشا
عايق بيهم كندر حلم غير السلعة المغشوشة
كتروا العديان وليت معاشر غير السيوفا
جاري بين الزناقي للنهاية لي معروفة
حتى نواحد ليلة كنت مرفوع وتعديلا خانتني
جبرت راسي فالأرض مجموع والحنشا كيقطني
شني باغيين هاد الناس شني باغيين مني ؟
بغيت نبيع ونشري فالحلال جاو كاع ما خلاوني
وليت كنبزنس غير فالحرام جاو نالحبس داوني
ملي شبرت فطريق الدين ولاو يخافوا مني
هاد المرة خرجت إنسان جديد بعقلية نقية
مربي اللحية وجهي منور باري من شي بالية
وليت من الجامع نالدار وغير من الدار نالجامع
ما بقيتشي طامع فخنز الدنيا وليت قانع
بالقليل ويكون حلال طيب بلا مشاكل
الغاية ديالي نعبد ربي ونفوز بالمقابل
كل ما تعمقت فالدين كل ما عرفت شحال كنا فاسدين
وخا كلشي كان حدانا قلوبنا كانوا بعادين
وبدات الحرب بيني وبين الشيطان
معرفتشي الحق باش نسكت عليه وبديت ننصح فالإخوان
جهنم، الجنان، الحساب، الميزان
شحال من واحد رجع نالطريقو التوبة فاتحة البيبان
كنا فالدار كنقيمو الليل ماشي كنضربو الكيسان
قالولي التجمع ممنوع هكذا قالوا الميريكان
واحد الليلة وقع ما وقع جاو فرع عليا الباب
عاوتاني جبرت راسي مقطن : متهوم بالإرهاب
شني باغيين هاد الناس شني باغيين مني ؟
بغيت نبيع ونشري فالحلال جاو كاع ما خلاوني
وليت كنبزنس غير فالحرام جاو نالحبس داوني
ملي شبرت فطريق الدين ولاو يخافوا مني
التعليقات