كل الحكاية اننا عايشين حياه متلونة
علي كل لون ممكن تكون بس الحكاية مكعبلة
حسب الظروف والمشكلة بتلاقي ناس متحولة
الصبح لون والظهر لون وادي يا سيدي الامثلة
لو انت ماشي يوم في حارة واللي قدامك عطل
بتشتموا بمليون عبارة ومن العصبية بتتهطل
لكن لو انت في موقفه بتبقي عايزه يعذرك
يجي يواسيك ويزق فيك وفي النهاية يقطرك
واللي معدي بتشتموا ولو قدرت بترجموا
ازاي يعدي من قصاد عربية سيادة حضرتك
لكن لو انت علي الطريق ماشي بخطوة مدلعة
بتبقي مستغرب اوي الناس دي ليه متسربعة
حكمك عليا خليه عليك
حب لي يا اخي اللي انت حبه ليك
دي هي دايرة وبتلف بيك
اللي انت عملته فيا غيري هيعمله فيك
ماشي تعاكس في البنات بتحاول تلمس جسمها
بتصاحب دي وتحب دي من ورا ابوها وأمها
ولو في يوم بقي يا خفيف عرفت ان اختك زيها
عرق الرجولة ينط فيك مع انها من سنها
لو شفت حد مسها او حتي اتكلم عنها
بتعدمه العافية يا شيخ عشان تجبلها حقها
بس الحقيقة مش كده انت اللي فيك المشكلة
داين تدان حكمة زمان قالوها ولسه مكمله
حكمك عليا خليه عليك
حب لي يا اخي اللي انت حبه ليك
دي هي دايرة وبتلف بيك
اللي انت عملته فيا غيري هيعمله فيك
ولو هتكلم علي البنات عايزة يا دوب يجي سنة
هقولك ايه واعيدلك ايه ده حالها يا عيني بالبلا
اتجوزت بدري يقولوا مالها ملهوفة كده
ما صدقت يجيلها واحد ما تختار بين ده وده
كبرت ولسه ما جاش عريس يقولوا يا عيني عنست
معمولها عمل اكيد علي رجل نملة اتفشفشت
عدت بقي واتجوزت يبقي السؤال ها خلفت
عدت سنه ومخلفتش دي تبقي يا عيني ادبست
العيب بقي فيها ولا فيه وان جبتي عيل طب خاويه
يا بت ما هو بالعيال تلخمي جوزك تربطيه
خانك خدي الشقة وسيبيه عشان العيال استحمليه
لا لا سيبيه استحملية لا اربطية لا اخلعيه
اطلقت
اطلقت تبقي اكيد دي ست وحشة ومش تمام
دي جوزها كان شايلها شيل هي اللي زودت العيال
اتبهدلت وفشولت بأيديها حياتها اتقندلنت
يالا بقي الحياه كده بلاش سيرة بقي ده وده
حكمك عليا خليه عليك
حب لي يا اخي اللي انت حبه ليك
دي هي دايرة وبتلف بيك
اللي انت عملته فيا غيري هيعمله فيك
اما الحداقة دي طبعنا عشان نقول احنا هنا
داخلين بوش رجلنا والفزلكة دي تخصنا
عايز تروح طريق قنا ادخل هنا وروح من هنا
ولو وصلت يا فقيق قبلنا وتف علي وشنا
سياسة تلاقي واقتصاد حل مشاكل اهو ده المراد
ناقض ودكتور في القراض وفي عيد ميلادك ابو الفصاد
ده انا واد حكاية وأعجبك خليك معايا لبهدلك
طول ما انت جنبي انت في امان تبعد هتبقي خاين جبان
حكمك عليا خليه عليك
حب لي يا اخي اللي انت حبه ليك
دي هي دايرة وبتلف بيك
اللي انت هتعمله فيا غيري هيعمله فيك
التعليقات