مستني ايه....
وانت اللي قاعد بعد نص الليل ترتب ف الورق
يفوتك مشهد سيندريلا وهي جاهزه للحفله
تنام ف كل لحظه مهمه في حياتك
فتصحي وتسأل عن نهايه وسر للقفله
قاعد ع الرصيف من زمن ولا حد كان لمحك
سايب اصول دنيتك وحياتك مع واحده لا عرفت تختار صاحب ليك تسند عليه
ولا حتي بنت تداوي جرح يوم واحد
ابويا سافر للخليج
وساب حكايه جوا الكتاب بيسرد سرد
سافر سنين ومغبش عني لكنه غاب
اربع سنين م السفر ولا حتي شفت جواب
ولا جاب لأمي الورد
**********
(بخيال علمي....)
كان في بنت تسرق فساتين من عنيها
اسرقها وهي جوا فستانها
لو كانت تسيبني ثانيه ف يوم
مفيش ولا ورده تيجي ف مكانها
واخاف جدا لو مره جاتلي متاخره
تنسي المعاد او اقول انها هتغيب
وان الغياب حاضر ...بيغيب لناس بتغيب
كل الفتارين مليانه هدايه لأول مره اوضح ده
في مسافه بينا مش عاوزه تقل معاها
سميتها مسافه يمكن علشان
انا برضو لوحدي وهو معاها
بسأل عليكي بقالي سنه
ياللي انتي قاسيه حنينه
قايمه بجميع جرايم البعد
وماشيه وسطهم هاديه مطمنه
سبتيني ليه...؟ وانا كل ما ابعد تلقائي يسحبني الحنين لصوره
وحياه حلوه متنفعش لعازب زيي
وانتي يا حلوه مش كنا متواعدين
طب لي منستيش زيي
شفتك ف صوره كنتي فيها معاه
قالتلي: مش ذنبك كل الملايكه تبان هوا جمبك
بحس بيكي مهما كنتي بعيد
وشايف ضحكتك حلوه
وحاجه كدا من جوا جوف الست
لأول كوبليه سمعته مش غنوه
قالو وقت الفراق مفيش كلام يتنطق
غير ان هناك قلوب عماله تنادي بعض
بيقولو يبعدوا هما ...ملناش ف البعد
انا هنسي كل شئ حاصل الا نظرتها
هرجع برضو للمكان تاني
واسأل الفتارين ف اقول فينها
ويبقي لأول مره ف العالم
فستان بيسرق نظره من عينها
****
خلينا متفقين....
ان الحاجات لو اتكسرت تكون اتنين
نعمل اي والحل اي هو؟...
لو كانت ام كلثوم..هتغني اغنيه فضلت مماتتش
سعاد حسني .... لو كانت عايشه ... منتحرتش
عمار الشريعي...ربك وهبله النور وكان شاعر
وحاجات كتير تانيه متابنش غير بالوقت
كان فيا ناس ليا طب راحوا فين دلوقت
كل اللي حابب اقوله
انا شخص هنا بطوله
بيحارب الدنيا
عايش يقول هانت
حاجات كتير بانت
ف اواخر ثانيه
عمال يقول فاضل
للحلوه بيناضل
ولاحاجه تكون باينه
هفكر ف اللي كانو غياب
واستني من ابويا جواب
واضحك لصحبي ف وشه يمكن عشان
طلعله ف القلوب انياب
عضني بيها....
هغير كل ترتيب الحدث
هفضل باصص للحياه يمكن اكون صاحي ومنامش ع غفله
واسأل عيال الملجأ بعد واحده ونص طب لي السيندريلا مراحتش للحفله
وسعاد حسني لسه فاضلها فيلم جديد هينزل السيما
واغنيه الست هتتغني ع مسرح بدون فرقه وتلحينه
وهقول ان البشر عايشه تتابع الاحداث
وب ايدنا احنا نصلح الاشياء لو كان الغلط فينا
هنلغي الافلام م جميع السينمات
وهاخد حبيبتي ف مركبه ع النيل
وحبيبها الحالي يصبح قديم مجروح
واديها ورقه وقلم تقفل كل شئ مفتوح
واكتب قصايد شعر
وننهي العالم بالشكل اللي كان لازم يليق بيه
منير هيعلي صوته ف غناه
ونقسم العلاقات والكل ياخد كل اللي عايزه معاه
ما اعظم التجربه
خروج"
لو كان ب ايدي اختار
لكنت مخترتش اعيش اكتر من حياه بديله
واقعد ع باب القهاوي اسمع صوت الست وإن كانت قافله
كان ممكن اسأل سيندريلا راحت فين لما مرحتش للحفله
التعليقات