وضلوعي شَجر
وانتي طيورها
راح تُسكني قلبي يكون عنوان؟
ولا انتي قمر
جَيّ يزورها
ويغيب لو نور الشمس يبان؟
احنا الاتنين ولاّ انا وحدي
نَفَسين ف العشق وراسي تطير
وانتي لوحدِك وازّاي عَندي
مش عارف ليه أسألتي كتير
وانا أصلا زهقان م التفكير
لكن ف حضورك قلبي كبير
وضلوعي شجر
وانتي طيورها
راح تسكني قلبي يكون لِك دار؟
ولا انتي قمر
جَيّ يزورها
ويغيب في نهار الشوق النار؟
ياقمر محبوس فِ قَدَر مدروس
صورتَك فِ البَحر كأنّ غَريق
لو مَركب حِلمك كَلْها السُّوس
اناحنزل اجيبَك .. قلبي جريء
لكن لو كنت بجد بريء
اطلع ع البر ونمشي طريق
دي ضلوعي شَجَر
وانتي طيورها
راح تسكني قلبي يكون لِك بيت؟
ولا انتي قمر
جَيّ يزورها
ويغيب مايقولش ان جِه حَنِّيت
ويفوت كام ليل يِمكن مايجيش..
و العُمر يابنت الناس كام ليل؟
والقَمَرَات لأ ما بيعجِبونيش..
من غير روح .. قُرص رُخامي جَميل
بارِد فِ العشق يهدّ الحيل
وانا أصلا قلبي زي السيل
وضلوعي شَجَر وانتي طيورها
ولاَّ انتي قمر جَيّ يزورها؟
التعليقات