شوفى خريطه مصر جميله ازاى
الاخضر هو الزرع الاخضر والازرق هو النيل السكر
والاصفر رمل الصحرا اللى ح يخضر
ويصفر فيه الفلاح بالناى
شوفى خريطه مصر جميله ازاى
ع البحر نقطه شقيه واسمها اسكندريه
البحر خلى رمالها على طول منديه
وجنبها ع الخريطه مدن كتير ساحليه
رشيد ودمياط وجمصه وبورسعيد الفتيه
ع البحر الابيض جميعا فى المنطقه الشماليه
وفى جنوب الوادى الاقصر ونجع حمادى
اسوان واسيوط وطهطا ارض القصب فى بلادى
والقطن فى الدلتا ابيض يشبه دقون اجدادى
وبيتعمل فى المحله قماش جميل مش عادى
والناس فى كل الدنيا بيحبوا قطن بلادى
فى شرقنا البحر الاحمر وف غربنا الرمل اصفر
فى النص اكبر مدينه فى العالم الاسمر
القاهره ياولاد من البلاد اكبر وفيها اكتر مصانع
والناس كمان اكتر وكل يوم بيعدى القاهره بتكبر
بين بحرنا وبحرنا بين ارضنا وارضنا
هنا قناه السويس واحنا حاربنا هنا
وغلبنا اعداء بلدنا وكان جميل نصرنا
رجعت لنا فرحتنا وسينا رجعت لنا
وسينا فيها معادن وحاجات كتير عندنا
شوفى خريطه مصر جميله ازاى
التعليقات