Yemma εzizen a yemma
A tin ur nesεi tamtilt
Tṛebbaḍ-aɣ-d s lmeḥna
D nnuba ad am-nerr tajmilt
Yemma εzizen a yemma
A tin ur nesεi tamtilt
S warraw-im akken nella
Lwaḥid ad am-nerr tajmilt.
Nebɣa ad am-nerr lxiṛ
Γas neẓra ayen i am-nerra drus
Nebɣa isem-im ad yidir
D taftilt-im ur-tettnus
Ad tiliḍ am zik neɣ xiṛ
Ur nettak deg-m afus
Fell-am ad yekfu uḥebbiṛ
Fell-am taεkemt ad tifsus
Trebbaḍ-aɣ-d armi meqqrit
S wulac d wulaḥed
Γas tettmeḥneḍ di ddunit
Akken ur temtireḍ ḥedd
D ayla-inem tura mager-it
D lebda ur iɣelli ibedd
Akka ara tεiceḍ di talwit
D nnuba ad tezdiḍ lqedd
Tebɣiḍ-aɣ ayen yelhan
Si zik i t-id-teqqareḍ
Tebɣiḍ ad aɣ-seggmen wussan
Tebɣiḍ yis-neɣ ad tzuxxeḍ
Tebɣiḍ gar medden ad d-nban
D ayagi tessarameḍ
Yemma ulac tin kem-yecban
S nnig-m ur telli tayeḍ.
Yemma εzizen a yemma
A tin ur nesεi tamtilt
Trebbaḍ-d s lmeḥna
D nnuba ad am-nerr tajmilt
Yemma εzizen a yemma
A tin ur nesεi tamtilt
S warraw-im akken nella
Lwaḥid ad am-nerr-tajmilt
التعليقات