كل شي بلّش مع لبنان الكبير
بشعب ما بيجمعوغيرالعقل الزغير
بلّشت القسمة، الإنقسام والتقاسم
كل زعيم استلم ناسو و بلش يعبّيلون راسن
بدنا إنتداب, شو خصنا بالعروبة
اسأل الصبي بقلك فينيقيا بتمشي بعروقي
بدنا سورية... طول عمرو أصلاً لبنان
جزء كبير و مهم من أجزاء بلد الشام
و لما كانوا مختلفين عقصص منن قلال
قاموا طلعوا بفكرة … بسمّوها الإستقلال
ببشامون الشبيبه إتفقوا … على كل شي
بطريقة كل فريق بيطلعلو شوي من كل شي
و بما أنو في اشكال عالعرب والتبعية
عملوا وجه لبنان... ذو ملامح عربية
هنّي النص وهنّي بيخدوا الباقي
و بيطلع بلد … جداً ميثاقي
58, أول حرب أهليه
اجا حلّا الايزنهاور اهليي بمحليي
من بعدا اجت النكبه وقسّمونا عن جديد
ناس مع القضية ناس بدا توقف عنا بعيد
و اجا الاوتوكار كنا بعدنا نايمين
ولعت الحرب بنيسان الـ ٧٥
قسّمونا كذا فرقة و قسمناها بكل جدية
ناس مع ناس ضد بيروت غربية وشرقية
و ضلّن يقسّموا عكل فكرة وكل موضوع
صارت تكبر القسمه و رجع فينا الزمن رجوع
لحتى قعدوا سوا وطلعولنا هونيك حل
من بعدو للطايف ضلّينا … بنفس المحل
لبنان بلد عربي الهويّة الإنتماء
قسّموها بشكل جدد بس أحترموا الميثاق
نص بالنص كرمال العيش المشترك
انتو بتخدوا الجيش وانتو بتخدوا الدرك
وبلشوا يتسلوا كل فترة يكبولنا شي
حتى يقطّعوا صفقاتن خدوا هيدا تسلّوا في
كبّوا الليرة بالكعب … تنطلع من الجورة
TVA و Solidaire والحريري والسنيورة
و لما فلّ السوري, قسّمونا مرة تانية
فات الحابل بالنابل, مع ١٤ و ٨
ومن هون و بالرايح كلو تاريخ حديث
كل اللي صار بهيدي الفترة بعدو مغزى كل حديث
ضد السلاح أو معو؟ سعودية أو إيران؟
الحق على الحريري أو الحق على جبران؟
ثورة جوعان أو هي ثورة احزاب؟
كل ما نلاقي شي بيجمعنا بينفتح للفتنة باب
حكومة تكنوقراط؟ أو متلا متل هيدك؟
حكومة الوحدة الوطنية يلّي الكل كان فيا شريك!
مين مسؤول... عن تدهور الدولار؟
ركزوا معي عكورونا, نسولي شوي الإنهيار
ومن بعد مصيبة بيروت, بعين وقحة بخبّرونا
فيكن تسبّوا مين ما بدكن بس ما فيكن تسبّونا
و بعد ميّة سنة, ما في كبير بلبنان
إلا قسمة الزعيم و بين الشعب الانقسام
التعليقات