مساحة إعلانية
كل عين تعشق حليوة وإنتِ حلوة ف كل عين
يا حبيبتي قلبي عاشق واســــمحي لي بكلمتين
كلمتين يا مصر يمكن هما آخر كلمتين
حد ضامن
يمشي آمن
أو مآمن يمشي فين ؟
---
شابة يا أم الشعر ليلي والجبين شق النهار
والعيون بحرين أماني والخدود عسل ونار
واللوالي فى إبتسامتك يحكوا أسرار المحار
يا للي ساكنه القصر عالي إمتى يهنا لي المزار
كلميني يا صبية طال على الانتظار
كلمتين يا مصر يمكن هما آخر كلمتين
حد ضامن
يمشي آمن
أو مآمن يمشي فين
---
قصرك المسحور غيلانه أغبي من دود الغيطان
بعد مص الغصن الاخضر ينحتوا عضم العيدان
وإللي خلا الارض خضرا وإللي خلا الدار أمان
عاش بجوعه ملو جوفه مات بخوفه م الغيلان
روح الغلبان ما قالشِ عن شقا العمر إللى كان
كلمتين لمصر يبقوا هما آخر كلمتين
حد ضامن يمشي آمن
أو مآمن يمشي فين
---
آدي كلمة من عذابي قلتها لك باقي كلمة
من حنيني صنتها لك في الضلوع من دنيا ظالمة
كنت خايف يلمحوها يقتلوها ف سكة ظلمة
شقشقت والنور بشاير زهرة الصبار يا سلمى
يا نسيم الشوق يا طاير خد لمصر الصبح كلمة
طول ما يبقي الركب ساير بالبصاير والعينين
يبقي ضامن
يمشي آمن
يبقي شايف
يمشي فين
التعليقات