شرفت يا نيكسون بابا يابتاع الووترجت
عملولك قيمة وسيما سلاطين الفول والزيت
فرشولك أوسع سكة من راس التين على مكة
وهناك تنفذ على عكا ويقولوا عليك حجيت
"ؤاهو مولد ساير داير شيلاه يا صحاب الييت"
جواسيسك يوم تشريفك عملولك دقة وزار
تتقصع فيه المومس والقارح والمندار
والشيخ شمهورش راكب ع الكون وهات يامواكب
وبواقي الزفة عناكب ساحبين من تحت الحيط
" واهو مولد ساير داير شيلاه يا صحاب البيت"
عزموك فقالو تعالا تاكل بون بون وهريسه
قمت انتا لانك مهيف صدقت ان احنا فريسه
طبيت لحقوك من الزفه يا عريس الغفله يا خفه
هات وشك خدلك تفه شوباش من صاحب البيت
" واهو مولد ساير داير شيلاه يا صحاب البيت"
خد مني كلام يبقى لك ولو انك مش ح تعيش
لاح اقول اهلا ولا جهلا ولاتيجي ولا ماتجيش
بيقولوا اللحم المصري مطرح مابيسري بيهري
وده من تأثيرالكشري والسوس والفول ابو زيت
" واهو مولد ساير داير شيلاه يا صحاب البيت"
التعليقات