مساحة إعلانية
نومة ظهر بالصيف
سكوت بنقّط عرق
تتسكّر الشبابيك
وبتضل شقفة ضو تنبع
من شمس بماضيها
تتسلّل من رف تريس مستطيل
مكسور، ضاع
مثل أشياء كثيرة فقدناها
بلا وداع
نور أعتم من العتمة
يزعج الليوان
يهدي الغبار الشاحب
حصّة من الألوان
ويطير بجسم الضو
كل الرذاذ الهارب من شريطة إمّي
وبتصير أصوات البلد غيمة بعيدة
الهم بذبل زيّ ما بتموت نحلة
التعب بشلح بسطاره على العتبة
مليان من تراب العتب وحلة
إرخي النفس لثقيل علمخدّة
حاجة تلاهث بنومك
إرخي من ذراعك أوزان لمهدّة
تسألش عن شبع عمّرته من صومك
نومة ظهر يا يابا
هدّي الجفون
غربل التراب الناعم
من الوجع المدفون
ارمي بأرض النوم
بذور الأغاني الي نسيتا، تتكبر بحلمي
نومة ظهر بالصيف، يابا
غمّض عينيك ونام
تتركّب الأحلام من الآلام
من قزاز مطحون بسكّر
من أسخف الأفلام
من صور بكل محل بتحبّه سكّر
من خوف حابب يصبغ شعره
من بير حبر هارب من الدفتر
ومارد بتحمم بقعره
من شو بتتخيّل
كل م إمي تغنّي إم كلثوم
من صورة ملمس صدِئ
من صورة طعم الثوم
من شو شفت بمراية ابنك
إذا سمعت الألبوم
صمت البيت، امك نزلت عند ستك، ابوك نايم الضهر بالحم، شالح البلوزة، سينمائيّة، حم الضهر، صيف، ملل، تعب، فضاوة،
يرقّص حصان الصمت
مفدعر وفج وقديم
يقلع شلوش الذاكرة
ويقطف من الشوك ضمّة
جفف فواكه الزعل ع حفّة الشبّاك
إنسى الي لاحق فيك وما بنساك
ربّي الطمأنينة بقوّارة الغفوة
لاحق تفيق وتكسرها بقهوة
التعليقات