مش انتي ام الدنيا قلب العالم زي ما قالوا
سنين بتعلي كيانك وابنك بيخاف من خياله
مزروع جواه حرية بس الري سماد مكتوم
بتظلميه و تحاولي تبيني انه مش مظلوم
لو ماتحماش في حضنك هيلجأ للغريب
بتمرمتيه و بتمسحيه وتقولي شكله مريب
اصله اتعلم تاريخ بس جاهل في الجغرافيا
وامتحن في الملغي ذاكر المنهج بالعافية
بيحاول يعاند يساند يناهد في اللي شايفه فاسد
لكنهم يمنعوا يقمعوا ما بيسمعوا الا واحد
بيركب الطوفان دايماً صياد سمكه خبيث
وان واجه الاعصار يستنجد بالمغيث
نتداس لو الحماس قايد سجارته وفي شعلته
فتطير الطافية مش كافية ترخصيله سلعته
بحبك عارفة بتستغلي ضعفي لحاجتي ليكي
ذنبك ماربتنيش افرض ولائي للي حاميكي
انا صوت بينبح نمل سنانه اتشققت مالجوع
سكر يسد معدته و حيطة تداري الضلوع
نفسي تعامليني زي ما بتعاملي الاغراب
تقدميلهم دهب وانا اسف التراب
تعبت منك محتاجلك لكنك شخص مدي
ربنا طمني بيكي بس عالطول واقفة ضدي
كل ما احاول اعلي بإسمك بنزل سابع ارض
ولو الغريب دعمني اصبح خاين يبقي فرض
مشيت كتير في بيتك واسع بس مش بيسعني
بيضيق كلما بهرب واما استنجد فرصة يبعني
مليان هموم فوق اللزوم برد وغيوم وراضي
زعلان مخنوق ومش هايفوق واهو كله بالتراضي
ارض اتقسمت ناس سلمت للواقع بهدوء
يبيعوا و يشترونا بضحكة وراها اكبر خازوق
ماهو الغلط غلط مهما اتعدل او اتظبط
ماحدش باله ثابت عكس كده يبقي عبط
خالي بيطلع عينه وانتي بتزيدي في اخطائك
و ابن عمك بيطبلك كل مرة لقائك
بتعذبيني و تخدعيني بحب اكمني ابنك
وانا جيت الومك مرة تردي تقولي انا ادري منك
صحابك لما بيغلطوا بتبرري افعالهم
يوماتي بتجمليهم اصلك عايشة علي ملايينهم
وقت ما كنت عند شقيقتك داسوا عليا باستهتار
واما صابك بلاء عاقبوكي مشيتي عالتيار
زمان ستي اللي حكمت والخضوع كان ليها طاعة
دلوقتي صف غنم طابور رمزه القناعة
عايشين في خانة اليك و الهامش واسع بزيادة
وضعك مختل رجعي نامي وبريادة
بتسأليني ليه مافيش مابينا ديموقراطية
رأيك هايمشي اصلها بيروقراطية
فكرت اعوقك و اهجرك لكني اترددت
حاولت اغير منك تاني فالحقيقة ندمت
طبعك فرعوني والتكبر ساري جوه عروقك
وضعِك خلاكي في مكانة شبه الكل بيسوقك
جدي زمان جازف بحياته عشان تعيشي كريمة
وبرغم ده انكرتي جميله طول عمرك لئيمة
غصب عني واجهتك اصلي منك حاولي تفهميني
مكبوت بقالي كتير وانتي لسه بتقمعيني
كرهت حبي في أم كل همها نفسَها
ازاي بسكت وفيكي كل حاجة وعكسها
التعليقات