طلاب و طالبات جامعة بس ما فيش طموح
في نشاط سياسي بس ممنوع تروح
دفتر محاضرات من "أبوعاطل" , قهوة , دخان
اسحا تجيب معك كتاب و لا حاجة مفيدة..عشان
الشناطي للمدارس و احنا مش جايين ندرس
اجينا عشان المرض الإجتماعي فينا يبرز
محاضرات بمدرّج ..ناس كثير تفرّج
مدخل في علم صناعة الشعب الغير منتج
البنت السنة ثانية فيديو كليب و الشب مخرج
"اسحا الدكتور هداك برسّب"- " قصدكم الأعرج؟"
"هداك محاضر مش دكتور " – "شو الفرق؟" سؤال محرج!
"ول يا جماعة ما لحتوش تصيروا vintage!!
الكافتيريا عبارة عن حبة زنجر عملاقة بتتدحرج
و الي قاعد على الكاش شكله بحب انغّش
شب السنة ثالثة متعاون قلي "طول بالك"
رح تضطر تشوفه كل يوم من هو لتتخرّج "
طلعت لقيت ثنين مأنقجين فاضيين أشغال
بتمشّوا بسمعوا على التليفون حمادة هلال
عاكسوا الأمورة الي قاعدة عم تتغدى Sheps
قلبت عينيها لفوق و سلختها "إففففت"
الوضع زفت , عنف جامعي 101
و أنا جاي معاي على التخصص ولا واحد
قعدت أفكر "مستحيل طالب العلم يكون واحد"
بس شايفلك الجامعة كلها طالبة 3 ب 1
أشهر دكتور السنة الماضية ما نجّح ولا واحد
فأنا برجّح ايكون أحسن دكتور أتيس و احد
أنباء مسيلة للدموع ..فمضلّش ولا واحد
وبقولو السنة الماضية بمشاجرة انقتل واحد
سنة أولى كنت طموح و فايت اتعلم
سنة تانية تعلمت اني ما أحلم
سنة تالتة صرت لما أشوفك ما أسلم
سنة رابعة جامعة تمسحت و بطلت أتألم!
صاحبي الي بيدرس برا خايف علي أنحاز
لمجموعة إقليمية و أصفي في الإنعاش
وعدني يرن يطمن بس "مش متصور كم الأبحاث"!
و أنا فمكتبة وراء الجامعة عم بصور أبحاث
و الطابور طويل دواوين , فايعين ,
هبسترز , يساريين , اخوان مسلمين
أبناء عشائر , وافدين , أبناء فدائيين
جبهة شعبية , كادحين , شركس , مسيحيين
أجانب بدرسوا عربي و عرب عيب يحكوا عربي
كلنا أولاد آدم هذا بس كان طلبي
و ليش في دورية على البوابة و في حارس؟
و بعمادة شؤون الطلبة بتسمع مريم فارس
قارص و ذبان عايشين بعز بالحمام
لإنه آخر مرة تنضف فيها كان بعهد الرومان
أو لما كانت الأردن اسمها "جوردان"
بس ما أظنش تفهم علي لإنه التاريخ مادة اختيارية "يا مان"
نزّل ثقافة اسلامية مادة سهلة و مريحة
والمأكولات اليمنية على البوابة جوعت من الريحة
هاي ريمة ..كنت مصاحبها قبل ما أصاحب ديمة
بقينا نقعد بين الأشجار و نحكي عن الطبيعة
قرأتلها "مجموعة قباني" كلها قبل ما ألمس إيدها
أيام بريئة ,سنة أولى.. لو تسألني؟ ما بعيدها!
هسا سنة سابعة و بنظم حفلات بعيدة
في البحر الميت swim suits و مخدرات عديدة
شو بدك بالشهادة ؟ شو بدك بالبرواز؟
مش معك جنسية و معك جواز ؟
هندسة.. طب.. محاماة.. آداب
إنت مفكر يعني المصاري هيك بتنجاب ؟
التعليقات