لو فينا نرجع
لو فينا نحضن ماضينا
طفل زغيَّر عايش فينا
راكض ورا سرب عْصافير
مْفكّر حالو بدّو يطير
اه لو فينا
كبرنا يا إمّي وهمنا كبر
وضحكات الحلوة اتكسّروا
ع عتاب الزّغر
صاروا ضحكات مْزبّطين
وع قد الحرف مْقيّسين
وكل ما العيون بكّاها حنين
ترجع ببالا للزّغر
وتركض ورا سرب عْصافير
وطفل زغيّر بدو يطير
اه لو فينا
مّعَمشق عحيطان القلب غيمة
يشتّي مطرها صورة صباح الخير
وإيدين إمي تمد الخبز عالصاج
ونيران صاج يْدفّي شتي الغيمة
ولون البيادر ع طريق الدير
ويلفحلي وجّي نسمة ورا نسمة
تْمطّر عيوني .. تْكرّ الصّور وتصير
تبكي فرح.. تضحك حِزن
كل ما مرق نسمة
وترجع ببالا للزّغر
وتركض ورا سرب عْصافير
وطفل زغيّر بدّو يطييير
اه لو فينا
التعليقات