على بالك ولا البُعد خلى زمن الحُب ولى
كنت استنى مكالمه و عياطك في قلبي ولع
انا لسا بدمع كل ما اعدى من مكان و بسمع
اغنيه كانت بينا و ذكرى حلوه في قلبي اتوجع
لسا كلامك في بالي و همسك اللي في ودني موشوّش
انا متشوّش .. سيرة البُعد بتيجي قصادي اتوغوّش
كنت في كل مشاعري ليكي بحوّش و البُعد كوّش
و عهد الله حبيتك جداً و انا اصلاً مَتحبش
لسا فاكر ضحكك .. و نظرة عينك لما اقول " بحبك "
و اما امسك ايدك و اثبتلك ان مهما عملوا مش هنبعد
كل دقه في قلبي طالعه بـ إسمك و في حُضني رعشة جسمك
تثبت إنك هتدوميلي و توعد
ليه بنبعد .. معقوله الناس دي فرقتنا و كسبت !؟
الدنيا هيأتلي اني هفرح يعني عليا كذبت
حقك عليا بحبك .. مش هتبقى غيرك ام لـ " مالك "
هل فاكراني و لسا باجي على بالك !؟
على بالك انا ولا بيحلالك خلاص بُعدي
و قادره تعيشي من بعدي و سيبتيني
و فاكره ولا ناسياني بعاني و قلبي بيعاني
و مش عايز أقولك غير " وحشتيني "
مش عايز اقولك غير " وحشتيني " و مشتاق لـ نظره
محتاج لو حتى طله تنسي قلبي حُزن و قهره
يادي الحسره .. قدرنا عيطنا يجي مليون مره
حبيتيني و انا حبيتك ليه النصيب يبعدنا كده مش بصره
كنت عشانك بتخانق و احارب كل الخلق
مش هتبعد لأ .. مستوياتنا الماديه دي مش فرق
يا ناس ده كله كلام و ايه يعني ما بينا بلاد
و ايه يعني اني مش قد المقام كفايه اني اسمي " زياد "
حبيتك أوي .. سايق عليكي النبي اوعي تدمعي
مهما هتتوجعي مسيرنا نعود بكره هترجعي
انا واثق .. مهما الاحزان تلاحق هتلاقيني قصادك
متعيطيش و حياتي عشان بيوجع قلبي عياطك
الموت عليا اهون .. من ان تنزل منك دمعه
قالوا " داري شمعتك تقيد " و كنتى لي إنتي الشمعه
اما انطفيتي حياتي ضلمت مش باقي الا نور سجاير
بعيد عنك و مش قادر و لو ناسياني فاكر
بعيد عنك و مش قادر و لو ناسيه انا فاكر
و بتمنى في يوم قلبك ينادي لي
بعيد عنك و بتألم صحيح البُعد بيعلم
و نِفسي انا و انتي نتكلم و تحكي لي
نِفسي انا و انتي نتكلم و تحكيلي كل اللي صار
من امتى ما بينا اسرار هنكمل و انا عندي اصرار
مفيش ما بينا اسف ولا كان بينا في يوم اعذار
مش هعرف اني انساكي لو كان نسيانك بـ زرار
انا محتار ما تبوحي .. ايه سبب احزاني و جروحي !؟
مازلتي روحي حتى لو هتفارقيني و هتروحي
لو كل الناس قالت " محبيتينيش " و جابولي دلايل
هكدب الكلام ده كله و اقول " ملكيش بدايل "
انا مش فايق .. بعدك مليش صحاب و رفايق
بعدك متضايق .. البُعد خرّم قلبي رصاص بنادق
و عمري ما افارق لو وجودي حتى مكانش فارق
ازاي اسيب اخر قشايه و انا اساساً غارق
خليكي معايا لو قالوا حتى " مستاهلش "
و اتمنى في اخر مقابله تحضنيني حتى منستعجلش
صُوتك في ودني مازال .. اجمل من الكمان و الناي
مش عايش في بُعدك .. لو انتي عايشه فـ عايشه ازاي !؟
عايشه إزاي .. ده انا في بُعدك بشوف الويل
عايشه إزاي .. في مين بتفكري بليل !؟
عايشه إزاي .. و أنا أيامي مش بتفوت
في بُعدك كل لحظه بموت
التعليقات