قلبك قاللي " البادي أظلم " تقريباً نِسي إنه بادي
الفرح قال " هيخبط بابي " و نسيني النوبه دي
ما هو مش طبيعي أعيط يعني و في عِز النهار
حبيتك بـ قلب سيمبا , و كرهتيني بـ قلب سكار
جرحي مكانش طايب وقت ما كل جروحك طابت
و دي مش نغزه لا دي كانت طلقة فراقك اللي صابت
و انا فرحي راح , و ما إتبقالي غير دموع و جراح
كنت لوحدي في أوضتي زي جِني محبوس في المِصباح
انا كنت بتخيلها جمبي , و فاكر كل حاجه حصلت
انا كنت ببكي عشانها لكن عُمرها ما إتصلت
ايه اللي حصلك !؟ , كنت بـ أي حاجه مزعلاني بصارحك
كنت في صالحك .. ده انا حتى لو مزعلاني بصالحك
وقفت ضدي .. و جيت معاكي و جيت في صفك
لما كنتي بتظلميني قلبي عليا نصفك
جالك قلب إزاي تسيبيني انا مش عاجبني عقابك
كنت ميت من العياط , و سخسختي من الضحك وسط صحابك
و أهي حكايات تتحكي للناس , و كان ياما كان
لما إنتي بعدتي قلبي سابني , و راح نفس المكان
انا في التوهان .. و روحي بتطلع في الدخان
كان قلبي رخيص عـ الفرحه فـ إتباع في محلات الأحزان
انا كنت ميت بعدك بس لقيتك عايشه بعدي
إمبارح حلمت إن إنتي في حُضني صحيت لقيتني لوحدي
و انا راضي كنت بشوف أحلامي بتتدمر قصادي
متعود أعيط كل يوم مش هتيجي عـ المره دي
حُزني جالي من طرفك , و إنتي ليكي كتير أتباع
كان جزائي أضحي ليكي كتير , و بالرخيص أتباع
زيك زي چوب حشيش ضربته و مسطلنيش
الديلر نصب عليا , و الحشيش منسانيش
كنت ليكي مُجرد حاله .. بقيت في أسوء حاله
كنت كتبت ليكي ألف رساله , و انا همسحها حالاً
قولتلها " ليه كل اما ببني فيكي ألاقيكي تهدي !؟ "
قالت " مش كل مره هخونك تزعل إنتا نكدي "
هل .. كل الحُزن ده بكره يروح من بعد ما هَل
قلبي ليكي إتذل , و حُزني حَل , و مش لاقيلي حَل
الدنيا حَابه تجرح قلبي , و نازله فيا سَحل
قفلوا محلات الأفراح , و فتحوا لـ حُزني ألف مَحل
و أهي حكايات تتحكي للناس , و كان ياما كان
لما إنتي بعدتي قلبي سابني , و راح نفس المكان
انا في التوهان .. و روحي بتطلع في الدخان
كان قلبي رخيص عـ الفرحه فـ إتباع في محلات الأحزان
التعليقات